2013年7月25日星期四

變態超人(下)

(原圖: 誠伯基金會

上回講到,長實(0001)阿誠伯要將含咗幾十年的「雞肋」百佳「舌累」返出嚟,本來最有胃口即瀬的,就係華潤樓下間大士多華創(0291),不過呢間帶住老毛大號(毛公「潤」之)的「黨企」,最近一身屎,誠伯呢個時候拎間PK出嚟,叫賓架四圍撲買家,唔買都嚟睇吓,時機上,似乎唔係咁想同華潤做生意,爆個好次泰國正大的馬六甲僑資媽沙出嚟接貨,未必冇可能。

誠伯一話賣PK,Xianggang即刻起哄,講得最多,又係嗰幾飛,乜嘢撤資、仇富鬥地主影響投資環境咁。誠伯「撤資」呢個話題,大大話話講咗二三十年,有乜冬瓜豆腐,又拎出嚟揚兩吓,由20世紀「撤」到21世紀,撒嚟撒去都仲撒緊,煩唔煩膠嘅啫。

回帶到1986年,當日誠伯在香港的資產,佔成個集團超過9成,和黃(0013)食埋港燈(0006)之後各間上市同時已經佔香港股市的15%,誠伯開始部署國際化,主要殺去加拿大,佢接受當地Maclean's雜誌訪問時,已經話唔可以再在香港繼續「放題」,Husky就係當年買落,仲有唔少其他地產項目,包括令太子柒具「名震溫哥華」的「Regatta Court」(呢單嘢有機會再講)。

去到90年代初,誠伯撤定唔能撤,又成為熱門話題,當日誠伯同政府搞到好薑,導火線之一,哈,又係咁啱,又係同香港的電視市場有關,當日九倉(0004)伯爺仲未大去,但接近油盡燈枯,九倉想搞有線電視,誠伯就有件衛星電視(同北京中信扯晒天地線),不過港英政府卡能住咗誠伯,唔俾衛視放廣東話,單嘢撐到好行,誠伯在91年的華東水災籌款,公開講到如果政府唔俾衛視播廣東話,佢旗下公司不排除採取「激烈行動」,仲話希望政府唔好迫佢做一啲「唔想做的事情」咁。(最後嚿豬頭骨由英國佬搵咗梅鐸鐸叔高價收購,算唔算揞口費?)

討論誠伯撤定唔撤,查實根本冇意思。首先,屌,晨久早撒咗啦,到今時今日,Xianggang資產佔腸實禾米唔夠20%;第二,個個都可以撤,就係誠伯唔撤得,點解咁講,過去二、三十年,誠伯唔少大刁,例如引到P&G上釣拍住入大陸,都係因為誠伯同北京有偈傾,如果誠伯做出一啲動作,俾人覺得佢在北京已經斷晒線,即係話枱面上冇咗最重要的談判籌碼。

所以,估乳有暈,廢話,切條撚咩。

誠伯的發達之道,根據佢自己所講,就係「唔會賺到盡」,做生意留一線,留啲剩菜殘碴俾對家食吓,咁其他人先會信得過佢,生意日後自己找上門(有興趣,可以睇睇呢個誠伯訪問視頻)。

將呢個「唔會賺到盡」的做刁技巧,反轉嚟睇的話,其實可以發現,誠伯發達之道,就係在某一領域,建立類壟斷的優勢,大啖大啖狂啅一輪快錢,到形勢改變,或者自己策略調整的時候,將剩餘價值「舌累」返出嚟,做好人,換取更大利益,又大啖大啖的狂啅,呢本生意經,萬變不離其宗。

最經典例子:九倉。誠伯係第一個睇中九倉的華資孖沙,仲平價打咗口釘,消息爆出街之後,九倉股價炒起咗,船王包SIR又話想「棄舟奔陸」,結果誠哥放低到口的肥肉,聽滙豐(0005)大班沈弼話,將收購九倉的機會「讓」俾包蛇(等佢同怡和硬撼),呢單嘢誠伯除咗買賣九倉股權賺大錢,仲可以交換之後滙豐半賣半送(兼低息借錢)和黃控股權俾長實。

再遠少少,誠伯痴膠花起家,到1973年時候,已經疊埋心水搞地產,哈,唔知點解,又閹埋好多膠料,當年石油危機爆發塑膠原料價格爆漲,好多膠花廠嗌救命,誠伯聯合同業直接入口原料撓起中間人,同時將長江膠花廠的存貨半價分配俾痴膠花商會的同行,結果個個讚誠伯信得過靠得住。誠伯放棄咗自己的夕陽本業,換返來的,查實係地皮,仲要係免費,腸實早期唔少地皮,就係同廠佬合作發展,最後有幾多廠佬簽咗約但等唔切項目收成已經執咗粒或死能咗,咁就唔知道了。

從呢個角度出發,腸實PK呢盤生意,價值及經營環境都開始轉變,零息年代令PK的現金流冇乜大著數,競爭法及商品說明條例等政策轉變又令超市生意難做,橫掂入唔能到大陸,誠伯而家趁PK仲有剩餘價值的時候,拎出街賣,除咗可以套現大嚿現金(傳緊叫價三、四十倍PE… 喎),更應該睇吓誠伯想同邊個交換禮物、想交換啲乜嘢返來。

同樣道理,將成個局拉大拉長嚟睇,李氏力場壟斷香港幾十年,啅足幾十年大錢,家陣形勢改變,李啅人都可以化身碼頭風雲主角馬龍白蘭道,假如而家嘔返出嚟,誠伯又想換啲乜嘢返來,同邊個換,同老共換,定係同以前殖民宗主事頭婆換?從近年腸實禾米的部署,查實已經睇到一定脈絡,如果重點係搵大BUTT裂顛英女皇,幾乎可以斷定,腸實禾米未來發展,俾盡佢,就好似留在Xianggang的太古(0019)咁,專打「九0一」穩守突擊,只會守,難進攻,發展爆發力有限。

誠伯早月去咗汕頭,主持汕大新醫學院大樓啟動儀式,獲學生贈送超人首辦模型(見上面改圖的原圖),出席畢業禮時,自傷自憐憂國憂港,話「華人首富」呢個封號,令佢百般滋味咁話。(誠伯演辭辭節錄

死鬼羅德承好鐘意講一個關於恒地(0012)四叔的笑話。話說好多人問四叔,點先可以發達,四叔就話,好簡單,日日起身就諗點發大達,最終就會發,再問:「咁咪好易痴尻線?」四叔好坦白咁講:「梗係啦,你睇吓我就知道。」(呢個故仔可以在《羅德丞政海浮沉錄》搵到)

即係咁講,一個人要發達,仲要係大發特發嗰種,先決條件,對「錢」的概念,一定要同世界上99.99999%的人唔同,先可以晉身0.00001巴仙的大富大貴,同時要對錢,有一種近乎怪癖、變態的追求及迷戀,就好似HK變態超人咁,一見到底褲,就難以自己,即刻想老笠。

好多大富人家,都有呢種特質,好似誠伯二仔阿碌柒咁,當年食咗數碼港地皮,已經係全港所有地產大孖沙恨之忽得的肥肉,點知只係一場更大龍鳳的前戲,蛇吞象食咗香港電訊變成今的的電盈(0008),當年的「八號仔」,已經變成「老八」,香港千千萬萬小股民輸到底褲都甩咗。

又好似誠伯阿大仔柒佢咁,起樓認真取之有道,多年嚟唔少杰出住宅單位代表作,某某「平台層」單位,個睡房幾乎隊出碼路(見「僭建演義」);某某「窗台房」,本來無一物,買樓何事送窗台(見「見買褲送褲袋」);仲有某某「連天台單位」…… 又係賺盡樓市買家每一條底褲,呢啲唔叫「賺到盡」,唔通叫富貴浮雲?(仲未計冇你咁長命搞寶藥啅廿個億單嘢...)

誠伯仲有個好動人的故事,話說有日佢跌咗個兩蚊落車底,佢想執返,有個食蕉見到,幫佢手執咗,誠伯收返兩蚊落袋,再打賞一嚿水貼士,誠伯講呢個故事(故事視頻),正本係想講「用之有道」,又係反轉嚟睇,「跌咗兩蚊都要執返」,先真正反映超級巨富對錢的態度。

做得大孖沙,知心冇幾人(梅鐸老婆都阿Wendy釘姐姐都被人話係老共間諜),外人睇誠伯,更加只能透過傳媒,斷估外界對佢有唔少誤解,誠伯覺得委屈,可以理解,不過「賺到盡」呢家嘢,就冇可能係老屈囉。

誠伯條女阿海豚姐姐,2002年曾經無端端搵咗信報及信報月刋做訪問(應該想買信報好耐),問足六粒鐘,查實絕大部分係廢話口水,例如叫人睇下本冷門到佢老妹都唔認得的《Einstein’s Wife》咁,當日啱啱Tom佬(2383)收購ATV被山雞電視(2008)個流腸樂截咗糊,條街有人傳緊誠伯要將海豚姐姐雪入冷宮,叫人去了解吓愛恩思坦個老婆的委屈,唉,旋妹真係用心良苦,斷估呢個訪問的主要目的觀眾,唔會係一般財經茄哩啡囉。

訪問裡面,最精彩爆料,有兩條,一條係東方廣場單嘢(即係今日匯賢信佢就托(87001)),1995年陳希同落馬收皮之後,新任北京市委書記尉健行,特登邊請誠伯上京,當面宣讀一封信,澄清誠伯及陳希同冇任何特殊關係咁話。(海豚姐姐細說東方廣場

另一條料,八卦少少,周旋於董建華及誠伯兩大政商巨擘的海豚姐姐,講到董伯伯及誠伯的性格,話兩人同時具備「內向及外向」的性格,但誠伯激烈好多,「李生的性格是兩邊都極端的,所以他內在的張力很大。」

嗱,海豚姐姐講誠伯性格,信得過喇卦,咩叫做「兩邊都極端」、「內在的張力很大」呢,唔通講緊誠伯生意之道,總想留一線餘地,但係有時見到跌咗兩蚊、路邊有條底褲,又唔能忍住要執返啅埋?定係講緊,誠伯對錢的執著,本來可以啅更多,但已經好忍手?

由1979年時代雜誌的Superman,到今日皇后大道中的大頭魔鬼改圖,誠伯形象的轉變,唔會吓吓全香港人老屈你的。今時今日的香港,何嘗唔係「內在的張力很大」,各種矛盾打晒死結,真係超人先可以解得甩,作為香港主權過渡世紀大刁大茶飯的最大得益者,誠伯望住今時今日的香港,如果以「受害者」的角色出現,咪玩啦,不如入場睇《HK變態超人》好過。

誠哥、超人,你喺邊度?

關連文章:
1. 變態超人(上)(中)(下)

伸延閱讀:
1. 評台:如果變態超人在現實世界,他的敵人是… ?
2. 有道德搶劫--味皇:(惡搞)超油切
3. 投資一周:和黃差過新地


同場加映:

變態超人主題曲
阿伯第一的秘密,英國阿SIR腸實,
變態朋友,底褲絲襪,一見就老笠。
肚滿腸塞,點著襪,將港人重罰,
信佢朋友,往往輸凸,底褲全部輸甩。
送你柒具,起樓有道,隊尻出馬路;
喪搭擇雞,閪私有,啅夠扮逃走。
仲未夠!仲未夠!
東一刮,西一刮;
東一擸,西一擸,一蚊都擸...
飽上耳鼻喉,食夠唔撚走。
(「擇雞」係潮州話,私有講緊電盈,咪諗錯隔離)



23 則留言:

  1. 多射順叔,真係巧能正! 林亞之

    回覆刪除
  2. 回覆
    1. 已經加咗「海豚姐姐細說東方廣場」條LINK在內文,有興趣望吓啦

      刪除
  3. 回覆
    1. 打油換字,小小意思,點夠膽講「識填詞」...

      刪除
  4. COOL!

    順叔條視頻話誠伯跌左兩蚊都執又比反一百個看更,我覺得其實有幾個原因(並唔系兩蚊在量化寬鬆的世界上會消失):

    1)唔比貼士或比得少被人唱會好淤,
    2)比得多以後看更唔好意思再幫佢執(倒貼$98)
    3)貼$98以後可以有好多野可以講可以做宣傳,平過做廣告好多

    回覆刪除
    回覆
    1. 禾都同意(1)同(3),你揾個鏡頭隊實禾,禾都有好能多動人故事講。

      仲有,話說那些年,城中某富豪,某大電視台董事也。周中食飯時間,常往某政團中環寫字樓屙尿,皆因此君唔想在酒店方便,因為少俾貼士警俾人唱通街,多俾貼士又覺肉痛 ...

      刪除
  5. 精彩!順叔寫blog可以暢所欲言比以前730仲好睇! AT

    回覆刪除
  6. 順叔 可唔可以講下港交所
    自從年初升到百五蚊之後曾經跌到百二蚊都唔夠
    究竟LME真係搞到388無前途?
    唔該哂

    回覆刪除
  7. 正到冇朋友!順叔好野!
    最正係首詞同個首辦公仔,邊度有得賣?

    高渣

    回覆刪除
    回覆
    1. 禾冇玩首辦公仔呢類邪教活動,張SEED在網上求其抄回來的...

      刪除
  8. 爽!
    請問順叔,超人點解要打開囗牌呢?

    甘余魯

    回覆刪除
    回覆
    1. 當日TVB賣盤,曾經出現個唔少流口水的買家,包括四叔,同埋四叔的疑似泊車仔BIG鬼園。老共家陣有米,一條商家佬有冇利用價值,唔再係可以投資幾多幾多建設祖國,而係做唔做到一啲北京做唔到(唔方便做)的事,食人尻尻汪汪蔡做咗台灣傳媒大享(中時兼亞視)後變身寶島首富,真係咁啱?

      PK的策略價值,斷估冇電視台咁高,不過唔係冇,最少可以賣多啲國產奶粉,誠伯打開口牌,吊起PK嚟賣,斷估擺明唔想同任何一方單對單講數摸底,邊個有興趣,唔買都埋嚟睇吓(睇吓誠伯點做PK生意都好),搞到個場好能旺咁,可以吱出PK最大的剩餘價值。

      不過金魚哥,禾都係斷估,仲要陰毛上腦的斷估…

      刪除
    2. 好同意,搞旺肛交鎖都係同一道理。
      不過,超人咁高調賣PK,淨係睇錢?

      甘余魯

      刪除
    3. 金權金權,超級有銀士做生意,為錢死為銀亡,早排同某英國佬講開誠伯,Direct quote: He'll kiss anyone's ass just for money. 呢個睇法,對於一個對賺錢有接近變態/怪癖的執著/迷戀的生意人,唔會錯得去邊。

      誠伯邊個生意邊拉政治關係,講到尾,所有考慮都係為咗錢。

      當年賣橙好似好威,但時為1999年,中國入世在即,阿水都知道,去中國做厠紙筒都可能發達,以誠伯眼光同人脈,點解唔將千億利潤,搬去大陸投資?假設當日腸實禾米將賣橙所得,求能其放在大陸乜都買啲,而唔係在歐洲英國燒錢,而家都唔係呢個價?

      呢個問題,禾在2009年寫「和黃十年」、2010年寫「仇富首富」、2011年寫「透視長建」,都未能諗明,近來見到香港的種種發展,終於開始明白。

      刪除
    4. 誠伯做政治交易發達(香港主權移交呢單中英之間的世紀大刁的中間人),不過做得多,越做越大,自由度似乎越嚟越細...

      刪除
    5. 引述上面伸延閱讀條LINK,味皇的觀察:

      「...以單純財產分配的角度來說,如果一個人年紀大,又同時覺得個仔係傻仔,咁味皇會建議呢位仁兄,賣出需要主動管理的事業,換成白痴式的固定收益資產,例如PK是主動管理的事業,換成白痴式的公用事業,可保白痴無憂,這絕不是對環境失去信心,而是對至親貼心的愛...」

      刪除
    6. 可能大仔無能力承繼超人喺上邊嘅政治資產,所以避免行得咁近,明哲補身。

      甘余魯

      刪除
  9. 「...以單純財產分配的角度來說,如果一個人年紀大,又同時覺得個仔係傻仔,咁味皇會建議呢位仁兄,賣出需要主動管理的事業,換成白痴式的固定收益資產,例如PK是主動管理的事業,換成白痴式的公用事業,可保白痴無憂,這絕不是對環境失去信心,而是對至親貼心的愛...」

    絕對同意。雖然大少並非白痴,但以強國術語講就系不懂國情,同船王女婿唔乾淨就絕對相反。如果要靠國內收入食胡,大少可能會好大鍋。不如換資產為固定收入又政治政策穩定的地方少少地慢慢賺好過。

    我記得順叔以前好似講過大少同國內某高幹傾生意時合約條文講得太細節,搞到高幹覺得太煩將生意轉比其他人,搞到誠伯要親自同大少上門謝罪。

    回覆刪除
  10. 同英國佬行得太埋,同中央自然貌合神離,有個咁唔識做人既仔,點玩大陸市場?著數攞得太多就會知道以後未必再有呢隻歌仔唱,味皇既評語好合理。

    回覆刪除
  11. 多謝財大文.又學到好多好多野

    回覆刪除