2013年7月22日星期一

變態超人(中)


上回講到,日本英雄漫畫改編的真人電影《HK變態超人》今個星期公映,撞啱長實(0001)阿誠伯有單PK刁,財經茄哩啡唔能忍住要抽吓水寫吓財經影評。

超級市場呢門生意,新對手隨時由石頭爆出,冇人冇物,政治肌肉唔夠大嚿(Walmart自2008年起單單為咗殺入印度已經花咗2,500萬美金政治游說費),好難長期保持優勢(葉玉卿老公在加州就有間「Hong Kong Supermarket」連銷店,威過,近年好似唔係咁掂,就係例子)。

香港超市,可算異數中的異數。

作為超齡宅男,財經茄哩啡讀得書少出國唔多,唔知道地球上,仲有冇邊個國家或者地方,超級市場會好似香港咁集中,PK同惠康,各自半匡天下,呢個雙頭壟斷,由英治殖民時期,已經開始形成,1997年之後,行業集中度更高。

超市的出現,首先趕絕大量糧油雜貨舖,例如1973年惠康推出袋裝米之後,香港人就開始改變糴米的習慣,零售米舖執粒,跟手趕絕埋小型超市。廿幾年前,香港仲有唔少地區性的超市,例如柴灣超級市場、油麻地超級市場咁,仲有過一間KK超級市場(後來被廣南收購,2001年粵海系爆煲之後執粒),根據消委會2003年一份有關超市競爭研究報告,1996年至2001年間,小型超級市場數目,大幅下降41%(就連過江龍好似廣南、仲有家樂福,都頂唔順PK惠康雙劍合璧)。

控制咗最重要的零售網絡,超市自然惡過供貨商,入貨價平過人(又可以拖數),零售價又貴過人,仲成日掛住「全港至平至抵」、「大減價」等宣傳搵七人笨實,類似現象消委會多年來篤爆過無數次,於是一件「睇見就眼冤」的「雞肋」,變成幫誠伯「日日賺」、「賺到盡」的霸權超市。

真正掌握「唔會賺到盡」之術,查實係香港「大BUTT裂顛」殖民時期的英國佬。當年滙控(0005)恒生(0011)、置地(牛奶公司)食美心,都只係食一半留一半,啅咗控股權,留返一半利益以及經營權俾華資,等佢哋幫英國佬搵銀(順叔到今日都認定恒生擠提一役係「大BUTT裂顛」陰謀),容許誠伯在超市、電力等市場,同傳統英資對分利益,異曲同工。

要真正了解李氏力場,就要明白呢套將英國利益,同華資財團捆綁埋一齊的金權政治。

1997年香港主權移交,係中英之間的一場世紀大刁,誠伯作為香港首席孖沙,誠伯唔會只係代表華資利益,同時亦要代表英國佬的利益,中英雙方都默許認可,先可以由97前發到97後,好似超市及電力市場,雙頭壟斷在英治時期形成,97後繼續發揚光大,PK發即係惠康發,港燈(0006)發即係中電(0002)發,任何影響到PK惠康競爭力的政策威脅,例如競爭法、商品說明條例咁,唔知點解,總係諸多阻滯,誠伯發功即係幫嘉道理拖,變相做咗半個英資利益代言人。

叉遠少少講,當年滙控同怡和等英資大班對著幹,支持誠伯及九倉(0004)伯爺包蛇,都係做緊同一個捆綁動作,俾你做英國佬,明知97大限要撤退,英資遲早要含撚,最高招就係養大一兩件華資孖沙,在某程度上會代表吓英國利益。舉個例,1997年7月1日香港財政儲備(連埋土地基金), 3,500億港紙,英國佬唔可以搬返去「大BUTT裂顛」,有乜好得過養肥一兩個相對信得過的華資孖沙,將在香港賺返來的錢,搬去英國投資。大家可以計吓條數,誠伯近十年在英國歐洲的投資,少唔少得過3,500個億?

言歸正傳,差啲唔記得今期講PK。

如果香港的超市霸權,只因為誠伯商業眼光高超,同政治肌肉冇關的話,PK應該在中國好能巴閉啦,PK早在1994年成為第一家登陸上海灘的外資超市,門店一度有廿幾間,但擴張野心被大陸的資本限制卡能住咗,到2000年執剩一間咁大把,2006年學Walmart搞Superstore唔掂,之後再扮上菜搞高檔超市Taste又唔能掂,舊年全線PK收皮,如果真係咁能英明神武,又點會三進三出上海灘,搞嚟搞去得個吉。

好喇,而家香港政府終於的起心肝搞競爭法,啱啱執行的的商品說明條例,又搞到馬經講「全港最準」都唔得,又有想加入共產黨不得其門的阿信屋(0759,疑似)呢類新形勢新對手,誠伯終於同大家講,唔想「日日賺」,可能將件含咗幾十年的「雞肋」舌累返出嚟,PK可能賣盤。

牛頭角順嫂都知道,如果PK賣盤,最有興趣接手,又最可以因為本身業務發掘百佳潛力的,就係華潤樓下隻零售綜企華創(0291)

1949年共產黨上台之前,成立過好多公司,呢類在地下陣線的商業機構,已經全部收皮,碩果僅存的只有一間華潤集團,可以話係最紅的一間「黨企」,可以想像,唔少老共派嚟香港的的情治人員,都係在華潤掛單,多年來擔任唔少秘密任務,包括協助誠伯的老友老鄉莊世平成立南洋商業銀行(解釋咗呢間銀號點解唔合併入中銀集團),仲有60年代大躍進冇得食年代都要供應香港的「三趟快車」。

誠伯同華潤合作,更加歷史悠久,華潤第一個地產項目,就係同誠伯合作,在1979年,買起成個天水圍(冇錯,係成個天水圍5,200萬平方呎土地),項目涉及投資百億計,更步定橫跨97大限,土地問題成為英國搵中國傾香港主權問題的缺口,天水圍亦成為香港前途信心的代名詞。

誠伯同華潤咁有淵源,如果真係要賣PK,姣婆撞正姣仔,仲要係熟人,應該一拍即合,即刁至係,不過上個星期,外電傳出PK可能賣盤的時機,有好似唔係咁對路。

上星期有個新華社樓下報紙的記者,實名「踼爆」華潤電力 (0836)早幾年百億貴價買爛煤,呢單嘢,查實已經傳咗年幾兩年,今年兩會期間,有條友已經「實名舉報」過,仲在網上四圍貼一封俾華潤老大宋林的公開信,乜料都爆晒,不過好快被河蟹,封公開信順叔留咗底,有興趣可以跟住呢條Link(123億天價併購案,華潤欠股民及國民一個交代),溫故知新,新華社記者只係執人口水尾,最重要訊號,只係間接證實咗要隊呢間「黨企」的力量,就係來自黨內。

華潤雖則話有幾個月時間做危機處理,不過今次涉及國際投資者利益,一身蟻,華電係香港藍籌,宋林係港府經濟發展委員會成員,北京好信得過的梁愛詩仲要係花樽董事,「黎CY」呢類輿情特攻,又點會放過呢個機會,梗係大唱特唱,呢個時候傳出PK要賣盤,好似有陣想整鬼華潤的味道(當然大前提係華創真係想買PK)。

當然啦,呢個世界,老共要做嘢,未必吓吓要搵黨企國企,好多人可以幫手,例如早排滙控賣平保(2318)兩成H股的辣手煎堆,就爆咗個泰國正大出嚟,唔知去邊度撲咁多銀,百億美金接咗滙控手平保之後,早前個月仲有六十幾億美金食埋泰國零售批發商萬客隆(Siam Makro);那些香港足球班霸精工老闆黃創山家族,近排好似咸魚翻生,間Bangkok Skytrain好似越做越有。

呢堆馬六甲華僑幾多斤兩,生意做得大同老共有冇關係,唔知,不過近年香港超市既然大把泰國貨,突然殺個正大卜蜂出嚟,接咗誠伯間PK,唔係冇可能的,老共在許家屯年代的香港鬥地主方針,叫做「拖住英資、穩定華資、爭取外資、團結僑資、台資,壯大中資」,家陣在香港做嘢,中資太敏感,英資太含撚,華資又未必穩,連兩間電視台都搵咗台資,PK賣盤爆間僑資接貨,唔會太出奇。(呢個觀點,部分來自REALFORUM的網友)

下回再續。

關連文章:
1. 變態超人(上)(中)(下)

伸延閱讀:
1. 消委會: 食品及家居日用品零售市場的競爭研究報告(2003年)
2. 中國經營報: 李嘉誠麾下超市三度折戟上海灘
3. 華潤雜誌: 香港天水圍這片土地,這片領土
4. 中華人民共和國公民李建軍: 給華潤集團董事長宋林先生的公開信
5. WSJ Blog: Investment bankers seek shoppers to PK
6. 朱泙漫屠龍記: 2014高達渣古的終極決戰


同場加映:
變態女超人

2 則留言:

  1. 南早報正大唔買,因為地價太貴 http://www.scmp.com/business/companies/article/1290404/aeon-china-resources-eye-bids-li-ka-shings-parknshop-say-sources

    回覆刪除