Best Blogger Tips

2012年8月5日星期日

買褲送褲袋(上)






本來無一物,何事建窗台。

今期由一幅網上瘋傳、窗台大過房的照片,睇睇點解香港住宅樓盤,越嚟越多窗台平台露台。

長實(0001)樓出晒名型英帥平靚正,一間公司對自己有信心,就唔怕公開自己的成功秘訣,上星期,副主席李澤鉅,竟然披露咗長實賣樓的最高商業機密,原來樓盤單位的窗台,查實賣大包益街坊,「送嘅」。

深受感動的香港人,相信唔介意被洗腦,請跟住大少的語氣,第一個字拖長少少兼特別大聲,跟住嗌一次:「送嘅」!

嗌多次:「送嘅」!

大聲啲:「送嘅」!

Yeah。

買樓送窗台,咁蝕底,仲可以一年賣樓賺幾十億銀,你估咁容易,唔信你試吓吖,拎條縮水兩個碼,不過有八個大褲袋的牛仔褲,喺條街大聲叫「買褲送褲袋」,睇吓班街坊行過,會用乜嘢表情望住你。 

香港人又係嘅,吓吓針對住長實,搞到大少連最高機密都要爆埋出嚟,好似屯門個盤海譽,一幅窗台大過半間房的圖片,都可以在網上瘋傳一餐,嗱嗱嗱,大少回應的技巧,值得所有香港公眾人物好好學習研讀,先放低一句「買樓送窗台」似非而是的金句,震攝全場心神,然後撻句類似「Net Area」的術語,當記者唔知佢講乜的時候,就換個概念,用唔會公開的「合約細節」,「大」班小記者冇睇「樓盤圖則」等公開資料,又話者「兇」人哋「睇唔明」、「冇做功課」咁。(Youtube: 記者朋友記住要做功課) 

長實所有負責賣樓的高層,好似老實樓神趙國雄咁,呢幾招已經練到出神入化,萬變不離其中,屢見不爽,大孖沙要在公開場合大石壓小蟹,冇可能同佢咬文嚼字,你贏囉。

咩係「Net Area」,查實亦無需深究,一個住宅單位,建築面積又好實用面積又好「Net Area」都好,呎價千變萬化,只係幫助消費者衡量單位價值的工具,去到最後的買賣合約,永遠只有一個單位一個價錢,例如海譽一個單位過千萬元,唔通你可以講價,同長實講唔使佢「送」窗台打個八折咩,掉轉頭,長實大少亦可以話,一千萬只係買一個窗台,其他面積全部「送嘅」,一樣得。

香港消費者學嘢喇,大少披露呢個香港最重要消費市場的最高機密之後,大家下次去買牛仔褲,記住要問吓個Sales姐姐,邊幾個褲袋係「送嘅」,Sales姐姐一定會被你撩得好開心,話唔定會打個折過你添。

以前的住宅樓宇,多數係方形柱體,近年絕大部分變晒多邊形,型過變型金剛;幾十年前,好似長實的城市花園、黃埔花園咁,名字簡簡單單,單位四四正正,邊度會話咁多窗台、工作平台、環保露台,而家長實做地產,由大少打骰,就冇以前賺得咁盡喇,今日長實的新盤,一個單位分分鐘送五六個乜台物台,生意真係難做。

要了解呢個變化,就要講多次「非結構預製外牆」呢個概念,近年新盤所有窗台平台露台,絕大部分都係「預制組件」,唔知點解政府認為好環保,鼓勵發展商多啲使用,豁免計算建築面積,即係唔使錢送俾地產商,所以近年新盤,「免費贈送」的窗台平台露台越嚟越多。

「預制組件」亦可以係貼住窗台露台、用嚟做間格的牆身,咪睇少一道10厘米厚100厘米濶的牆身,如果係「預制組件」,幾十層樓個個單位都有一道,加埋就好和味,所以近年新盤,古怪間格特別多,大家可以諗吓,香港則師係咪冇晒空間感,點解要花咁多時間,畫埋晒啲鬼五馬六的圖則,又唔見長實中環總部,搞到個變型金剛咁呢度一忽嗰度一件?

「買樓送窗台」已經唔容易,將幾百呎實用面積,變大一倍成過千呎住宅單位,造成豪宅的視覺效果,難度更加高,聽講傳說中的發水秘笈裡面,有一招「腸乾屎頓凸」,可以話係香港樓盤圖則的「超必Standard」, 唔係咁易chok,下回再續。

關連文章:
1. 買褲送褲袋(上)(下)
2. 老實樓神(上)(下)
3. 買樓自由行(上)(中)(下)(未完)
4. 發水秘笈(上)(中)(下)

伸延閱讀:
1. 長實回應「窗台房」足本完全版
2. 有線:海譽「窗台房」《樓盤傳真》
3. 有線:《樓盤傳真》Facebook網頁



同場加映:
底褲一見就老笠


3 則留言:

  1. 說好的"將幾百呎實用面積,變大一倍成過千呎住宅單位"設計圖呢?

    回覆刪除
  2. 我老豆老母九十年代系深水埔做地產經紀話,行內寫樓盤紙通常都會跨大建築面積咁寫,都系相對的。人地明明四百呎建築,如果睇落同人地寫五百呎差唔多,就通常要寫五百呎。

    點解過到關?因為買家有睇過樓,上律師樓簽約時有睇過樓契。加上當年無咁多電腦化,根本無人可以搵咁多資料。宜家應該無可以了。

    買現樓有睇過樓無得賴,始終系市場供求決定價格,但系買樓花如果睇唔明圖就好容易上當。但系最唔抵系果的強拍重建賠償的人,明明六百呎建築五百呎實用,就陪翻六百呎建築四百呎實用,好冤枉。我唔知香港銀行有無用建築面積計算可貸款額、風險、或利息,但系如果有而且會有負面影響的話就又系好冤枉。

    回覆刪除