財經茄哩啡（完）

（刊於2012年10月31日am730)

今年今日

今期唔知開乜好，口淡淡，講吓女人未必係阿媽的投資方法。

如果將全地球投資者放埋一齊，多數會形成一個「常態分佈」(Normal Distribution)，最右邊，總會有一兩個巴菲特李嘉誠，靠投資眼光賺到變首富，最左邊，又必定有人輸突幾十副身家。

如果市場資訊對稱，人人知道咁多，公平競爭鬥眼光鬥心理質素，這個常態分佈的投資表現平均數，應該係「零」，有人賺就有人蝕，不過金融市場的零和遊戲，當然唔會咁公平，因為資訊永遠唔對稱，多數係小部份人贏大錢，大多數人輸底褲。

股神巴菲特出晒名鐘意睇年報，聲稱2003年全世界唔睇好中國巨型國企之時，每股個幾港元投資中石油(0857)一役，就係睇年報睇返來，長實(0001)主席李嘉誠亦講過，以前鐘意睇年報睇吓入點做生意，睇咗幾千億上市資產回來，自己仲有千幾二千億私己錢分身家俾細仔，反而股神成份身家在冇派息的巴郡，餐餐隊漢堡包唔係冇道理的。

幾十年前新聞財經新聞唔多條，搵本年報望吓都難，搵到年報又識好寶的，可能已經掌握到大量人冇我有的市場資訊，今時今日年報呢類基本資訊已經普及，於是投行賓架呢類正牌財經演員，就會搞到通街結構產品衍生工具，有咁複雜得咁複雜，金融市場的進化，永遠有需要將絕大部投資者排除於真相之外，咁先可以確保，將大部分人，推向投資表現常態分佈的負數區域， 1978年的誠哥穿越時空來到2012年的香港，未必睇得明和黃(0013)長建(1038)本年報。

惠理集團(0806)擺明車馬靠投資搵飯食，年報內第一頁，通常會大大隻數字放幾個亮點認屎認屁，當中真係有意思的，只有兩項，第一個係過去19年「至少經歷七次地區性及全球性金融危機」（而仲未爆煲），第二項就係「每年造訪公司2,500」次（好勤力咁收集情報），講緊惠理40名全職芬佬的工作，就係全年頻頻密密咁去訪問上市公司，直接觀察公司業務同時面對面觀察管理層，令自己在資訊不對稱的市場處於強勢一方。

不過市場資訊相對最平衡對稱的一刻，往往就係金融大災難的時候，因為大部分衰嘢都會現晒形，所以「別人恐懼時貪婪，別人貪婪時恐懼」呢句唔記得咗邊個講的說話，係順叔咁多年所見，散戶最有機會賺錢的投資方法。

睇財經評論、大行報告、股神天書，唔係唔得，不過應該當係刺激思維的方法，跟住人哋貼士追揸沽，就肯定錯晒，不如得閒去圖書館蒲吓，香港天綫、八九六四如果太湮遠，搵返1998年、2008年大股災時的舊報紙，睇睇報紙頭版講乜，「重溫」、Relive一吓當日的市場氣氛，關關難過關關過，乜嘢股市海嘯金融核爆，地球咪一樣咁轉，到再有類似境頭出現的時候，問吓自己有冇勇氣將呢個阿媽係女人，但又最難實行的投資理論付諸行動。

香港人太多投資的衝動，太少理財的觀念，投資同儲蓄查實可以雙線進行，唔係叫你死怪死抵做度叔，而係當係鍛練自己的理財紀律，當係儲「股災基金」都好，點解股災殺到嚟的時候，咁多人零彈藥？

臨尾講多句，寫財經評論，本身是一項搵自己笨的投資，講錯嘢被人鬧到豬頭，唔覺意講啱，亦好快冇晒市場價值，你睇是但一本金鏞小說，已經在大陸翻拍N加9次，電影電視遊戲機版權收到手軟，就知道寫評論不如寫咸故。

唔經唔覺，在這裡起壇已經三年，實不相暪，順叔表面上係個財經茄哩啡，事實上，真係一個財經茄哩啡，寫專欄只係副業興趣，最初一星期一篇500字，到舊年今日餐餐開飯，已經思窮想盡，體力腦力不勝負荷，係時候收爐，今次係財經茄哩啡最後一期。

望返之前的墨汁口水，滴晒汗，幫襯開的熟客應該知道，睇順叔寫嘢唔會發達的，因為得啖笑，唔係妄自菲薄，而係順叔天生鐘意搞笑多過寫財經，未來某日，社會楝樑又好牛頭角順嫂又好，如果有人同順叔真人講開，某年某日睇財經茄哩啡笑到咔咔聲，順叔都會笑到見牙唔見眼的。

祝各位笑口常開。

友綠再會。

關連文章:
1. 順叔自道
2. 財演與財茄

舊年今日

喪搭財經茄哩啡老感點唱，即係「老點」。

投資，聽講不外乎順流逆流，做人何嘗唔能係，不過順叔淨識得玩逆流，所以到而家都係戇尻尻。ＨＥＨＥＨＥ，祝大家逆流又賺，順流又賺，時時都咁「順」！

順流逆流：越大鑊越快樂

別論樓市（下）

（刊於2012年10月30日am730)

大陸同胞投資香港樓的「需求」雖然旺盛，但係都要有人通渠搭路，所以香港地產商近年成日北上推銷搵客，部分樓盤的市場推廣工作，甚至百分百針面對大陸，在大陸的地產網或者影片分享網站，好多香港地產公司高層落力推銷香港樓盤的精彩片段，唔排除部分地產商賣樓俾大陸客，分分鐘送埋法律服務財務貼士，點樣在香港開公司搞信託，避開額外印花稅甚至最新的買家印花稅，無聲無息的「走資避稅」。

如果內地資金係一個水溏，香港樓市相對只係一個熱水壺，之所以咁快對接，就要多謝香港大孖沙及工商界人大政協代表，多年來不遺餘力的推動中港融合，食咗咁多年大茶飯唔肯起身，而家反枱講唔掂數，唔玩一國玩兩制，所以呢，香港大孖沙一個二個代言人講「香港核心價值」，同乜都代表中國共產黨講「社會主義優越性」，一樣咁柒。

近半年有部分本來在大陸搵食的地產商，例如中國海外(0688)、雅居樂(3383)咁，無神神在香港買塊地起吓樓，傳統四大內地發展商「萬保招金」，又個個在香港借殼上市，於是有人話新時代大陸資金大舉南下，在肥田冇人爭的香港地產市場，加入競爭，打破所謂地產霸權咁話。

咪咁天真，住。

萬科講到明有意開拓美國地產市場，有間在美國上市的「鑫苑置業」，最新更加投咗塊紐約市中心靚地開發，香港地產商叻甩邊，咁多年做大陸住宅冇話特別出色，外面更加風大雨大，中國地產商咁夠薑殺入香港衝去美國，「底氣」只有一樣，就係呢啲樓盤，根本冇需要擔心「需求」。大陸地產商近幾年嚟，肯定已經掌握咗一大班客仔的資料，知道佢哋好有「需求」，將資金由內地搬到海外，最佳方法，就係直接在香港或美國，買地起樓俾自己的客仔投資。

蛇有蛇路鼠有鼠路，熱錢要搵窿捐入大陸，又話者中國有銀士要搬錢出國，梗有門路，規模有幾大，全世界包括人行行長周小川都只能夠估估吓。

理論上，中國外匯儲備的變化，主要來自貿易及直接投資，以前美國佬玩QE同QE2，外匯儲備增長，高過貿易順差及外國直接投資，於是大家估估吓有幾多百億美金熱錢流入中國，而家美國上演《強姦3》第三輪量化寬鬆，今年頭3季，中國竟然出現熱錢倒流的現象，資本及金融項目逆差854億美元，唔使問阿季，大陸有大量有銀士走資搬錢。

外管局日前嗱嗱聲出聲明，否認「兩三千億美元資本外逃」的傳言，更顯得欲蓋彌彰，如果外管局夠膽認，成班外管局炒得啦。近排由國家主席熱門人選習近平，到總理溫家寶，都成為老美傳媒踢黑目標，話中共領導人的姨媽姑姐老婆細舅二奶朋友，在香港美國等地方，身家幾多幾多十億美金，老美傳媒踢呢類消息，未必可以盡信，不過如果話十八大改朝換代前後，唔係個個趕住搬錢出國，順叔又打死唔信囉。搬錢出國，邊度方便得過香港呢個大銀袋，又邊度穩陣得過投資香港物業，呢個正正係香港樓市重要的「需求」來源。

2002年的11月，香港講緊要搞陸路離境稅，免得北上消費趨勢繼續衝擊本地零售業，連續6年通縮，擔正做房策地政救火大隊長的孫明掦，掟出「孫9招」停建居屋，港府連土地供應的決定權都放棄埋，十年時間，邊個會諗到，2012年11月的今日，香港會講緊買樓印花稅，2022年11月的香港又係乜嘢世界？十年前的太古城，平均呎價3千銀左右，今日過萬，未來十年，總唔會再升2倍3萬銀一呎啩。

預測樓市升跌，總難免有人會鬧，或者不久將來被人鬧，不過臨收場忍唔住講多幾句，而家是但搵間香港樓，望吓個價，結論只有一個：唔值。人生其實有好多個十年，睇吓閣下點投資，講緊投資自己的時間，將自己未來的十年綁在這一刻的香港樓市，更加唔值囉。

關連文章:
1. 別論樓市（上）｜（下）
2. 肥田冇人爭
3. 當奴作首（上）｜（下）
4. 萬保招金（上）｜（下）

伸延閱讀:
1. 新報: 林奮强自辯無偷步售樓
2. The Economist: Capital Outflows - The flight of the renminbi

別論樓市（上）

（刊於2012年10月29日am730)

回看2010年11月

今期又講吓樓，一個對香港人嚟講，可能越來越陌生的題目。

2009年底，呢度寫過一篇《最好賺但最冇競爭的生意》，講到在香港起樓呢個行業，肥田冇人爭，政府係唯一有實力加入住宅市場，同大地產商拗手瓜兼左右市場方向的玩家，臨尾講咗句，買樓「風險高於機會」，結果過去3年樓市大幅跑贏股市債市，馬後炮分析的話，錯在嚴重低估香港樓市的「需求」。

上星期政府又再出招，增加樓市額外印花稅的年期及稅率，適用年期最長由2年加至3年，即係買樓最少要承擔3年市場風險，期內賣出最少要俾10%至20多額外印花稅。另外打擊「炒風」的重藥，除咗本地永久居民，境外人士或任何以公司名義買樓，即要交15%買家印花稅。

假設一個物業的成交「面價」，唔涉及買賣雙方就分擔稅款的折數，一個內地客買一楝1,000萬銀(港元，下同)香港樓，人仔兌港元已經破八，只需要780萬人仔，150萬元特別印花稅等如117萬人仔，加埋都係897萬人仔，即係話內地買家仍然有9折優惠，因為匯率造成的購買力優勢並未完全消失，更重要一點，內地客買香港樓當年長線投資的話，仲可以博港元同美金脫鈎，到時又可以賺多一筆。

最無辜係少數有實際需要買香港樓的老外，香港政府可以放低少少「自由市場」的怪癖，不過礙於政治現實，唔夠膽只係針對拎住人仔買樓的中國居民，不過有實際需要在香港置業的老外，不過據順叔所接觸的在香港生活的外國朋友，基乎冇人睇好香港長遠樓市，錯手被殺的良民應該為數不多。講開買家身份又講，用公司名義買樓，除咗令買家身份唔容易曝光，其他考慮幾乎百分百為咗避稅逃稅，又增加交易對手的律師費，如果政府真係想透過短期稅務措施控制樓市，用公司名義買樓，稅花稅係咪應該大抽特抽？

政府出招之後，打開過去幾日的報紙，幾乎所有評論都話，樓市「急涷」難免，不過已經唔係咁多人夠膽預測3年後額外印花稅「解涷」之後樓市會係點，處於目前人類金融歷史上最唔尋常的年代，聯儲局都話零息年代可能去到2015年，將時鐘回撥到2010年11月，當時港府第一次實施額外印花稅，當時已經話係「重藥」，打開當日的報紙，仲有地產代理話擔心落藥過重，好多中小型經紀行會執粒，結果之後兩年樓價再升三、四成。

今次香港政府推出埋針對非永久居民的買家印花稅，同時公布咗一個好驚人的數字，今年以來，購買一手樓的買家，高達19.5%唔係香港身份證持有人，每5個新單位，就有1個唔係香港居民，有實際買樓需要的香港人，可以負擔的住宅面積已經越嚟越細，如果將樓市再細分，例如500萬元以上的新樓，非本地居民的買樓比例，可能遠遠高於兩成，順叔好有興趣知道吓，有關數字的比例，仲有過去幾年的變化，兩年前的曾蔭權政府，成日話密切監察樓市變動的情況，究竟有冇「打好呢份工」。

兩年前的額外印花稅，買樓一年後兩年內稅率都要5%，結果焗住樓市買家坐兩年，連二手樓供應都少咗，結果樓市「乾升」，令次如果再歷史重演，香港都會變得幾恐怖。經過過去兩年的經驗，亦可以總結一個幾安全的結論，就係咁多內地人嚟香港買樓的「需求」，唔似得97年上一個香港樓瘋，唔係人人掛住短炒，而係有實力有耐性的長線投資，例如唔想成副身家放在內地要「走資」到有法治保議的自由香港，又例如要配合「雙非」子女在香港讀書咁，換句話講，近年來自內地的樓 市購買力，源於實實在在的「需求」，人哋都唔喺度炒樓，香港政府壓抑「炒風」，壓條菜咩。

下回再續。

關連文章:
1. 別論樓市（上）｜（下）
2. 肥田冇人爭
3. 當奴作首（上）｜（下）

天下貸評

（刊於2012年10月26日am730)

MOODY'S

MOODYZ

今期開債券。

大家記唔記得，2009年11月財經茄哩啡在呢個欄起壇的時候講過，為咗搵Bank cheque，財經金融界個個都係演員，真正的「財經演員」，唔係口水講股佬，而係有本事策劃財富大轉移食大茶飯，將大部分人的底褲轉化成小撮人褲袋內銀兩的人；大家又記唔記得，舊年順叔寫《貸評清剿》及《貸評之亂》時講過，將市場規模加埋評級影響力一齊比較，標普及穆迪可以話係金融歷史上最出色的「財經演員」。

財經茄哩啡看天下，美國佬過去百年國運越隆，最重要原因有兩個，第一，橫渡太平洋大西洋全面參加第二次世界大戰，兼且打贏；第二，成功將標普穆迪兩間美國信貸評級機構，變成全球金融建制主導性的組成部分。以前開片打仗靠發行War Bond融資，結合拳頭硬實力同埋發債集資軟實力，楊基佬當然天下無敵，冷戰的時候，有冇人會借錢俾蘇聯？

經濟學家成日鐘意乜嘢「效率市場」，查實拗嚟都嘥氣，剩係望吓地球金融及信貸評級的種種混帳，而經講能完，如果加埋惠譽的三間歐美評級公司真係咁掂，1998年唔會有亞洲金融風暴，2000年唔會有安然Worldcom，2008年唔會有地球金融海嘯，呢兩三年唔會日九日講住歐債危機啦。

信貸評級明明混吉，垃圾公司要發債借錢，都話要搵錢評級公司買Rating，送錢俾人顏射，唔知點解好似香港強積金呢啲寃大頭，硬係要跟住乜嘢3條A、9條J被人老點，又唔明香港政府點解成日對標普穆迪的廢話咁著緊。

除咗楊基佬拳頭大可以狂發債之外，在債市的入場券，好搞笑，查實係要有錢，越有錢，借錢越平，香港坐住幾千億外匯儲備財政儲備，呢幾年咁低息唔走去大借特借發展債市，掛住個好睇唔好使的Debt-free光環，戇尻尻坐住一屁股美債，到第二時唔想玩掛鈎，全香港退休基金大部份係美元資產都唔知點算，邊有人咁蠢。

經過呢幾年種種貸評之亂之後，全地球開始明白，要天下太平，首先要擺平美國的信貸評級霸權，開始做嘢，有單新聞香港人唔係好留意，中國的國產評級公司大公國際，同俄羅斯的RusRating，及美國的Egan-Jones Ratings，合作成立一個新的獨立評級機構，叫做「世界信用評級集團」(Universal Credit Rating Group)，講到明現有的國際評級體系已經喪失提供公正評級的能力，需要有新國際評級機構加入，聽講總部仲會設在香港。

查實中國同歐洲、歐洲自己、以至亞洲各國本身，都講緊要搞新的信貸評級公司或者機制，十劃未有半撇，今次中國另起爐灶，歐洲得個俄羅斯，就知道中歐之間互信合作基礎仍然好弱，Egan-Jones Ratings在美國，更加係一個營養不良、啞叉冇支又要單挑三個歌利亞的小大衛，被標普穆迪圍剿之餘，又被美國證監告到甩褲，呢個中俄美斷腸人組合，要挑戰信貸評級的百年霸業，長路漫漫，不過無論點都好，而家就算澳門大飛馬報開始搞信貸評級報告，順叔都會覺得可信性高於標普穆迪咁囉。

全球絕大部分已發展的金融市場，都係一個正金字塔，債市資產佔大多數，上面的股市規模反而好細，因為正常又成熟的投資群體，資產分配會偏重較穩陣的債市。順叔冇數據在手，不過香港市場同大陸一樣，唔計銀行貸款，應該都係一個倒金字塔，香港政府話搞零售債券市場，搞嚟搞去得個吉，iBond當抽新股咁，咪玩啦。

聽講睇財經茄哩啡呢個雞棚的，以後生仔居多，臨尾順叔都想講幾句唔係咁啱聽的說話，散戶在股市日日夜夜出出入入牛牛熊熊，最後賺到錢的唔會有幾多個，唔係叫大家而家衝去買債，而係最少要認識吓有啲乜嘢債券的投資渠道，可以俾自己的理財計劃多一個選擇同埋彈性，當香港報紙唔係通街股評，而係有人講吓貸評，又唔使聽標普穆迪老點，金融市場可能會更加天下太平。

關連文章:
1. 貸評之亂（上）｜（下）
2. 貸評清剿（上）｜（下）

時裝大茶飯（下）

（刊於2012年10月25日am730)

衫屎必裂　三年大計　一年一折

上回講到今天下半年開始，據中央結算資料，海通國際(0665)及中南證券兩間證券行，過去半年大手吸納思捷(0330)股份，講緊十幾億銀(港元，下同)貨，跟住就嚟單50億供股。

海通國際前身係周大福證券，聽講中南證券又同新世界發展(0017)榮譽主席鄭裕彤食過好多大茶飯，一年前今日的新世界又用過供股呢招，唔少人自然會無限聯想，彤叔或者新世界班大帝，可能對思捷都有興趣。

例如今年6月，即係海通中南手影曝光之前，思捷主席同埋荷蘭靚佬行政總裁齊齊劈炮，又搵前恒生(0011)大班兼坐咗思捷董事局15年的柯清輝做主席，柯大俠當日被傳媒扑咪，問佢思捷點算的地方，就係中環新世界中心，當時亦有報紙的八卦財經欄猜度過，柯大俠在新世界中心有個私竇，唔知係咪趁股價超殘，搵緊彤叔買起思捷咁話。

思捷今次供股，同新世界舊年手法好似，都係海嘯價二供一，仲有消息公布後3個交易日之後就除權，有心街外人想買多啲，又或者小股東想睇清楚啲，都冇咁多時間做嘢。求其搵間最近供過股的香港上市公司，例如寶勝(3813)，9月21日宣布供股，按連權基準買賣股份的最後日期在10月4日，都叫做有兩個星期10個交易日俾市場反應，思捷今次快刀斬亂麻，同新世界手法咁似，又唔怪得咁多人將兩間公司連埋一齊講。

柯大俠在思捷董事局坐足十幾年，遊輪坐到變大眼雞個個跳晒船，佢老人家都處變不驚，引用柯大俠自己講法，「我肯坐落去梗有我的原因」，換個角度諗，既然柯大俠係思捷資歷最長的董事，萬一思捷爆煲升仙，甚至出現大大劑醜聞，等如刮花佢老人家貞節牌坊，要令「思捷女士」吊住條氣，甚至死屍翻生，最好方法就係搵返個疊水大股東射住鎮場。

彤叔對時裝零售又好似好有興趣，舊年中突然爆出彤叔的私人投資旗艦周大福，買咗十幾巴仙佐丹奴(0709)股份，過去一年越掃越多，最新持股已經超過25%，仲搵埋個乖孫入董事局，即係真係對呢間公司堅有有興趣 ，成件事變得更加有故仔講，十幾廿億銀控制到佐丹奴的亞洲零售網絡，幾十個億控制埋思捷全球萬幾個網點，或者更有得諗，最低限度，如果今日日本Uniqlo再打佐丹奴主義，彤叔已經打咗口大釘，奇貨可居。

至於佐丹奴加思捷，又或者時裝溝周大福有乜協同效應，阿水都知道，協同效應呢家嘢，係投資銀行賓架氹財主落疊的必殺技，講乜都得，只要有人信，例如思捷加新世界百貨(0825)，即時幫一個國際品牌打通中國消費市場的任督二脈；又或者橫掂思捷啲衫都賣唔去，索性大搞時尚零售，賣吓鐘錶玉石咁，可以幫周大福珠寶(1929)打開全球零售或批發的新渠道。更何況，新世界周大福系，出咗名雜食，如果唔係，唔會搞到成間公司咁「綜合」，橫掂巴士地產碼頭電訊酒店乜都有，開多辨時裝零售更加冇問題。

當然啦，新世界長年咁大管理層折讓，正正因為由管理層私人投資對上市公司業務，太過雜食，樣樣有，樣樣管理得唔係咁好，彤叔子孫滿堂，係咪代表家族管理一個咁綜合的業務系統更加有效，仍然係最大疑問，新世界要收窄管理層折讓，最應該係減肥減嘢，唔係食多幾餐大茶飯谷到間公司越嚟越雜。

香港股民鐘意跟「明星效應」，一間九唔搭八的公司，只要有位城中富豪入股，硬係鐘意坐貴風車跟住炒，所以邊個大孖沙入股邊間公司，股價即時炒上即時封蝕本門，講到尾都係嗰句，俗語有云，衫屎必裂，人哋食緊大茶飯，街外人又幾時會知道人哋想做乜，當係智渾焗飯呢類飲食吹水節目咁睇囉。

關連文章:
1. 時裝大茶飯（上）｜（下）
2. 大餅變紅衫
3. 思捷女屍（續集）

伸延閱讀:
1. 立論: 思捷抽水博翻身方向錯晒
2. 樂香園：柯清輝幫彤叔買起思捷？
3. 鄭家純回應收購佐丹奴: 「做嘢前唔可以講出嚟」

時裝大茶飯（上）

（刊於2012年10月24日am730)

今期開時裝零售，香港上市最大嗰兩間，一間叫思捷(0330)，一間叫佐丹奴(0709)，近年不約而同，周不時傳出，同新世界發展(0017)大股東鄭氏家族的股權變動消息，奇奇怪怪，今期將各種傳聞新聞，抄抄埋埋炒埋一碟，嚟過拼圖遊戲。

思捷近年同全地球講要轉型，諗住毫掟185個億(港元，下同)，掟醒沉睡中的「思捷女士」(Esprit Lady)，不過好似冇乜邊個有胃口咀呢條睡美人，轉型大計出師未捷，由CFO到CEO已經跳船走人，堂堂藍籌，股價大上大落好玩過仙股，唔知道恒指服務公司容忍呢個俾面派對玩到幾時。

荷蘭靚佬CEO走人之後，思捷搵咗作新行政總裁，股價例牌又炒上一輪，後續指定動作，當然就係抽水，管理層選擇破天荒供股，二供一，供股價8蚊，較最後交易價折讓36%，最多抽水52個億，思捷話籌集資金主要用嚟做市場營銷，目標係短期內提高銷量，提升思捷的商業價值，即係話，抽水之後50個億，主要用嚟燒，賣廣告。

消息公布後，思捷美國預託證券股價狂插，原因之一係市場對「突然抽水大感震驚」云云。查實史書上記載得好清楚，有史泰龍就有忽必烈，既然「思捷女士」已經揈晒頭，股價舞上之後跟手抽水，嚟嚟去去都係嗰幾飛，都唔明有乜好震驚，你幾時見中策(0235)同埋國際資源(1051)呢類公司需要問銀行借錢，資本市場操作，操嚟操去已經搞掂。

唔想俾盤數銀行大耳窿睇，可以選擇批股或者供股抽水，一間公司大股東，正常嚟講，唔會咁隨會批股溝淡自己手貨，掉轉頭，好似思捷呢類股權賣到散晒的上市公司，除非明知條街冇乜人肯接貨，正常嚟講，批股係比較合理的選擇，因為成村股東唔知有幾多個肯齊心供股。

閣下要對某公司有一定了解，先會做某公司的股東係咪？所以供股呢個抽水動作，查實圍威喂，比較現有股東的眼光、比較對公司的了解，而一間公司夠竟值幾多錢，又有幾多個可以諗贏公司大股東，所以供股好多時係大股東平價增持溝淡散戶持股的最好工具。有時信者得救，新世界舊年今日，又係二供一供股，供股價6蚊唔夠，當日大手掃咗供股權供股的，而家已經賺咗一個開，之後彤叔等大股東持股有乜實質變化，順叔已經冇跟進。

「市場」永遠都要有唔對稱唔平衝的資訊，咁先造就到一少撮人贏大錢絕大部人輸底褲的零和遊戲，好似幾十年前搵本上市公司年報都難的年代，李嘉誠同埋巴菲特可以睇年報掌握市場脈搏轉化成為發達秘笈，到咗而家基本財經資訊普及咗，硬係就有成村投資銀行賓架，日久日整埋晒啲類似雷曼迷債、「ABS」或「C叉O」的結構產品，搞到全世界一頭霧水，遮住普通投資者對眼。

又好似一間上市公司的股權結構變化咁，以前大家估估吓，2003年開始叫做有進步，持股5%已上的長倉要公布，不過聯交所的權益披露只係皮毛，大戶手影你估真係咁易捉。

舉個例，聯交所中央結算資料顯示，今年下半年開始，亦即係思捷荷蘭靚佬CEO跳船股價大插之後，海通國際(0665)及中南證券在思捷的持股量大幅增加，講緊十幾個億貨，海通證券前世叫做大福證券，變盤之前係新世界阿彤叔旗下的證券公司，唔需要多講，中南證券大股東聽講叫做莊友堅，由之前電盈(0008)的撻Q私有化，到中策收購台灣南山人壽等大茶飯，都見到佢身影。

順叔從來唔留意大戶手影，所以呢單嘢冇留意，所有資料都係報紙上睇到再抄過來。中央結算資料顯示的證券行倉位，多數唔知邊個先係實益人，只可以估估吓。

下回再續。

關連文章:
1. 時裝大茶飯（上）｜（下）
2. 大餅變紅衫
3. 思捷女屍（續集）

伸延閱讀:
1. 蘋果日報: 海通、中南密吸思捷

三一再睇

（刊於2012年10月22日am730)

今期再睇睇三一重工(600031)呢隻最巨型民企A股。

外國人去美國投資買嘢，楊基佬通常舉晒四至五肢歡迎，不過只限於兩樣嘢，第一樣係越買越殘的美債，第二樣係好似次按CDO的劇毒結構產品，仲有當年IBM都諗住掉落垃圾桶的個人電腦，除此以外，在美國做企業併購可能係全地球最多阻滯的地方。

中國已經取代前蘇聯成為美國佬的最大假想敵，華資要去美國買嘢或者做生意，難上加難，由廿幾年前中國航空技術進出口公司買飛機零件製造商，到早十年中海油(0883)買Unicoal、華為買3Leaf，都因為政治阻力受挫，今年美國總統大選年，針對中國的動作更加空前絕後。

中興通訊(0763)及華為，在美國有好大大嚿業務，過去一年被人當監犯咁審，早輪被指住塊臉老屈做間碟，都只係忍係忍氣吞聲；好似渣打(2888)的歐洲銀行，呢幾年因為同被美國單方面視為「邪惡軸心」的伊朗有生意往來，罰埋罰埋都有一百幾十億美金，都乖乖交佬地費；三一集團其中一間外國聯營公司在美國一個豆腐潤咁大風力場項目，被美國封殺，竟然第一個嗱起刀仔反抗，狀告美國總統奧巴馬。

用簡單常識諗吓就知道，美國佬就算真係咁司法獨位，有冇咁好死咁容易俾個美國總統仔告，就算對美國司法認識得如零，都可以百分百推斷，唔好話勝訴，獲受理機會都唔大。

一間美國大型公司，例如Google，在中國拓展生意有拗撬，例如敏感字眼要被審查，查實亦隨時可以搵班專家摷勻中國的憲法或法例，開個記者會，話要將中國國家主席兼中共總書記胡錦濤告上法庭，問題係玩串派對之後，從今次後在中國就會冇啖好食，三一集團今次高調反抗，唔係挑戰美國總統的決定，而係直接將美國總統擺上枱，幾乎可以斷定，三一的風力場項目本來就只係試水動作，而家短期內都唔使諗在美國發大嚟搞，華為中興可能仲會嫌佢累街坊。

當然啦，三一作為第一間將美國總統告上法庭的中國企業，簡簡單單擺個Pose，已經謀殺大量菲林，呢單嘢變成國際新聞，免費國際宣傳，「Sany」呢個招牌，全球知名度突然暴升，三一集團成為反抗美國打壓的商界李小龍，後續公關工作做得好的話，在外國人眼中，可能升呢成為「最具代表性」的中國企業，三一重工早排在德國買咗件Putzmeister，拓展歐洲等海外市場或者好有幫助，亦唔好忘記，三一重工主要收入在仍然係中國，第一個出頭幫中國企業打爛仔交，話唔埋三一產品在本地市場突然大受歡迎。

中國企業話美國佬連串針對動作，因為在總統選舉年，要做吓騷，查實三一重工老闆梁穩根，本身亦可能正參與緊一項選舉大龍鳳。呢位一兩年前的「中國首富」，可能已經唔係最有錢的中國人，不過應該係最米的共產黨員，下個月舉行的中共十八大，梁穩根已經成功當選做2,270個黨代表之一，舊年底曾經唱到好勁，話梁穩根已經通過中共組織部的政治審查，有望在十八大成為中共中央委員之一。

五年一度的全國黨代表大會透過差額選舉選中央委員，聽講係共產黨代最體現「黨內民主」的一個選舉環節，十七大有204個中央委員，仲有167個後補委員，十八大有幾多件就唔知道，梁穩根唔單止係資本家，仲要係最有銀嗰幾件，如果成功晉身呢個中共權力核心就有故講。

順叔對中國共產黨的認識只係停留在BB班階段，不過今次三一將美國總統告上法庭，做到咁高調，純粹用直覺靠估的話，梁穩根十八大再上一層樓的機會睇落甚微，做到後補委員可能已經係爆大冷。

俾你揀，你會想繼續做中國首富，定係中國共產黨權力核心的資本家花樽，三一告奧巴馬呢場大戲之後，三一國際H股上市應該好快會捲土重來了。

關連文章:
1. 三一兩睇（上）｜（下）
2. 老共BB班（上）｜（中）｜（下）

伸延閱讀:
1. 中國經營報: 三一告奧巴馬案件背後或另有目標所指

占士邦箱

入境處尋日公布，3部在機場用作入境管制工作的手提電腦，懷疑被人撻Ｑ咗，失竊電腦內有3,000個外地旅客的Passport資料，不涉及任何本港居民，已報警處理。

呢單新聞，冇炒大到，不過成件事奇奇怪怪，一部手提電腦幾千蚊有找，無尻神神做乜有人會撻你入境處3部手提電腦，如果真係有人撻嘢，目的只會係電腦裡面的資料。

根據入境處向外公開的入境管制工作，涉及大量外國旅客資料、又雖要出動到手提電腦四圍走的，唔會有好多，最大可能，就係一種叫做「占士邦箱」裡面的手提電腦（上圖）。以前機場有唔少轉機旅客，落機後即時將護照撕毁沖入馬桶，向入境處報稱係「無國籍人士」。

入境處2004年成立「反偷渡情報局」，2005年曾經向外推介過所謂「占士邦箱」的秘密武器，查實只係一個簡單版攞你命三千，有台手提電腦、高速掃描器，仲有一個同理大合作開發的偽證檢測儀，聽講入境處會將「占士邦箱」放在高危航班閘口，旅客一落機即時掃描護照，又可以用3G網絡，將旅客資料同入境處總部所掌握幾十萬可疑人物名冊核對。

如果真係「占士邦箱」被爆格，唔使問阿桂，零零發撞到007，證明香港的間諜活動仍然非常活躍，尋日投資推廣署話駐港中外公司數目有7,250間，創歷年新高，真係咁多FDI，香港經濟應該好好啦，呢條數，只係香港情報中心的另類指標而已，有人話香港政府管治冇當年英國佬咁有效，因為冇咗政治部，唔係冇道理的。

話時話，中聯辦附近的西環舊樓，保值作用，可能冠絕港九新界，如果未被中資掃晒貨，分分鐘一有放盤，就會有買家出現．．．

關連文章:
1. 間諜公司（上）｜（中）｜（下）

伸延閱讀：
1. 明報: 入境處失3電腦
2. 經濟日報: 港產「占士邦箱」
3. 文匯報: 入境處偽件檢測儀 專「捉」假證

同場加映：

香港間諜指數

嘥氣大戲

（刊於2012年10月19日am730)

今期再睇睇中國的管道燃氣股。

呢個市場，財經茄哩啡之前寫個唔少，不過去到最前線，無論花咗幾多時間研究，可能都及唔上識一兩個行入人士或者中間，例如新奧(2688)夥拍中石化(0386)收購中國燃氣(0384)呢單嘢，最新劇情發展，應該令絕大部分局外人跌晒眼鏡。

燃料市場駁喉通氣入屋的Last mile，增長迅速亦七國咁亂，簡單總結一下之前的結論，包括對踩鋼線的民企要有戒心；好似當年鄭州燃氣咁打直做深一個主要城市的，相對仙女散花式全國插旗圈地的較穩陣；好似昆侖能源(0135)及中華煤氣(0003)咁，在上游市場有一定話事權的，又好過只係集中下游的玩家。

上面幾個標準，中國燃氣基本上合部肥佬，差唔多一年之前，新奧拍住中石化提出敵意收購的時候，呢間神秘民企燃氣公司的大股東劉明輝，啱啱惹上一身蟻，被公安搭走調查，當時行唔行得出屋企門口都唔知，而且公司股權分散，董事局內鬥不息，面對中石化加新奧呢個，國企加民企、上游加下游的強強組合，順叔當時推論，中國燃氣只可以吊高嚟賣，又或者最多投身其他國企懷抱，總之就係推個好價等賣盤。

不過劇情發展認真峰迴路轉，經過10個月N次延長收購建議有效期限之後，劉明輝唔單止可以行返出公安拘留所大步檻過，又搵到本來專注北京市場的北控(0392)掃貨打釘，中國燃氣更加有本事反客為主，保持管理自主免被吞併之餘，撬咗新奧牆腳，同中石化組成聯營公司，合作發展多項燃氣市場新業務，包括有可能染指中石化的跨省輸氣業務，拍住個財雄勢大的巨型國企，新奧在三角關係之中，反而被飛出局。

經過之前十幾廿年的群雄割據，成個市場最大幾間一隻手差唔多數晒，不過最大幾間，華潤燃氣(1193)及昆侖有大型國企老母，香港的中華煤氣及港華燃氣(1083)又財雄勢大，事後孔明望返轉頭，似乎係新奧趁劉明輝落難中國燃氣內鬥，搵埋中石化諗住食咗最大的民企對手。

根據中國燃氣7月底的公布，深圳檢察機構因為證據不足，冇起訴劉明輝，一個月後中國燃氣重新委任劉明輝做非執行董事，再過兩個月，中國燃氣已經溝掂中石化扭轉乾坤，可能燃氣民企的高層，之前太多疑似醜聞秘聞，中國燃氣呢間嘢又神神秘秘，劉明輝出事之後，個個睇死佢翻身冇望，最新傳出嚟的新聞，竟然係佢之所以被拘查，因為有二五仔偽做文件老屈陷害，真係唔知應該信邊個。

中石化當中肯同新奧埋推，理論上好啱傾，突然之間變心，如果中石化目的只係搵間民企及下游公司做個合營，牌面上好應該搵新奧而唔係中燃，不過點都好，中石化而家擺明車馬，繼中石油(0857)之後，亦會殺落下游，因為搞企業併購浪費一年時間的新奧，今後面對的競爭應該更大，被中石化過咗一楝之後，唔知會唔會搵個另一個國企碼頭。

講開又講，近年刨大陸新聞時，周不是見到住宅區燃氣管爆炸的新聞，城市化步伐太快，安全標準及檢查如果跟唔上有甩漏，可能埋落唔少隱患，聽講呢個亦係早年港華燃氣唔夠膽大搞的原因。

北京等大城市的安全標準應該高好多，斷估冇乜大鑊嘢，其他二三線城市就唔敢包，以前最下游的管道燃氣公司，主要精力花在圈地插旗，大陸住宅10年樓可能已經相當老化，維修及檢查費用有機會大幅增加，條數唔知點拆，留意燃氣股的話，要留意吓有關政策的改變。

關連文章:
1. 國民爭氣
2. 煤氣今天（上）｜（下）
3. 昆侖氣概（上）｜（中）｜（下）
4. 羣鴻氣海（上）｜（下）

伸延閱讀:
1.

老共BB班（中）

（刊於2012年10月17日am730)

十八大黨代表櫈仔分布圖(資料: 大公網)

十八大雖然叫做決定中國未來10年辦事人，但既然講到明係「黨代表大會」，即係只係中國共產黨自己搓嚟搓去的權力遊戲。

上回講過老共黨員過去10年增加2,600萬人，最新已經增加到超過8,000萬友，不過有資格行入5年一度黨代表大會的，由87年的十三大開始，都係維持在二千人左右，在十八大可以投票的，只有2,270個黨代表。

黨代表點選出嚟，綜合各老共網站資料所得，成個選舉工程在舊年11月至到今年7月進行，將全國各級共黨組織，分成40個選舉單位，提名由基層黨委開始，「黨委常委會」考察拗數再考察拗數幾輪之後，確定本身選舉單位的黨代表候選人名單，再開黨代表大會或工委擴大會議，以多於15%的差額比例選出所屬黨代表，例如上海作為40個選舉單位之一，分到73張櫈仔，咁上海共產黨組織的「黨委常委會」，就會搞張不少於84人的候選人名單，進行所謂「黨內民主」投票。

各選舉單位分都幾多黨代表席位，唔知，斷估都係上屆黨中央決定，或多或少反映所屬單位的黨員數目及重要性。

40個選單位，包括31個省或直轄市，中央國家機關、解放軍、武警、央企系統(在京)、中央直屬機構、中央金融系統加埋又有6個，以上37個選舉單位，全部都有公布代表團的名單，佔黨代表2,155人，剩低4個選舉單位，冇公開黨代表名單，呢115位神秘人來自邊3個單位，好易估，就係全國台聯、澳門工委，同埋香港工委，今次亦係中國共產黨第一次公開將「中央香港工委」列為單獨的選舉代表團。

雖然名單冇公布，不過如果邊位得閒無事，可以先下載新華社或者人民網公布的十八大2,270個黨代表的名單，再比對其他37個選舉單位的黨代表名單，2,270減2,155，剩低115個，咁就易認好多，按港澳台三地的人脈分辨一吓，就大概可以Shortlist到一份十八大「疑似香港工委」名單。

呢份疑似名單，應該只反映「中央香港工作委員會」的組成，唔一定代表香港的基層共產黨員有幾多人，有人估計過香港的共產黨員有二三十萬之眾，如果真係好似中共組織部咁講，搞乜嘢黨代表「陽光選舉」，就算搬去深圳起壇，都一定有風聲漏出嚟，所以一係香港共產黨黨員並冇傳聞中咁疊馬，一係香港工委的黨代表選舉，仍然停留在小小圈子遊戲。

「疑似香港工委」黨代表有乜人，查實都唔難估，例如中聯辦主任彭清華，仲有李剛、郭莉、王志民、郝鐵川等西環官員，唔會死錯人。

仲有幾個靠肉眼都認得出的「疑似香港工委」黨代表，包括香港投資者熟口熟面的中資老總，例如香港中旅(0308)前主席張學武、招商局國際(0144)主席傅育寧，仲有華潤創業(0291)阿媽華潤集團的大佬宋林，三間公司都係國資委樓下的央企，不過三位黨代表都冇出現在央企系統的公開名單，斷估都係「香港代表」，亦即係香港工委的成員之一，仲有中銀香港(2388)總裁和廣北，亦屬於「疑似香港工委」黨代表。反而中信泰富(0267)的老總常振明，作為中信集團的高層，名字就在中央金融系統的黨代表名單之上，可能一定程度上反映，中信泰富已經冇乜搞香港工委的工作，例如專心去澳洲掘鐵礦。

呢班既係上市中資公司高層，又聽命黨中央指揮的香港工委，除咗做生意仲有乜嘢任務，唔知，不過中共組織部都話要乜嘢「陽光選舉」，在香港呢個國際城市，共產黨的黨內民主選舉，仲係要神神秘秘，黨代表名單又唔可以公開，點講都唔係幾講得過去，中國共產黨點解唔肯在香港公開活動，純粹靠估的話，就係老共的所有理論，都唔可以合理解釋到，「中央」點解要同香港的「地方政黨」或政治勢力，平起平坐咁講數，

下回再續。

關連文章:
1. 老共BB班（上）｜（中）｜（下）

伸延閱讀:
1. 新華網: 十八大黨代表名單
2. 大公網: 十八大專頁
3. 人民網: 各省市十八大黨代表選舉結果

老共BB班（上）

（刊於2012年10月16日am730)

今期冇胃口講財經，十八大就快勝利開檔，足以左右中國政治經濟未來10年的發展，受到政壇靚女的「香港政治BB班」啟發，講吓十八大的ABC，對中國的金融改革步伐又有乜影響。

在目前香港的氛圍，呢個題目可能係票房毒藥之最，不過如果閣下唔知道「十八大」同「十二屆全國人大」有乜分別，最好花少少時間了解吓中共及中共歷史，自學國情教育。愛國無罪，反專制有理，要同共產黨講數，起碼應該知己知彼，長毛鬧共產黨鬧得夠大聲，因為喺香港講馬克斯可能冇乜邊個講得過佢。

如果閣下好緊張香港的「核心價值」，又好肉緊一國兩制的楚河漢界，策略上，應該爭取中共提高在香港的活動的透明度（例如政黨法立法），呢家嘢天經地義，而了解對家係乜水，甚至拒絕好似香港政府咁避避忌忌，大大方方公開討論中國共產黨乜乜物物，查實亦係「陽光運作」的好開始。

又唔怪得咁多人一頭霧水，中共政治長年最為人垢病之痛腳，正正係唔公開唔透明，黨代表民意代表政府官員撈埋一埋，局外人鬼知你班友在北載河游水沖涼桑拿時點講數，幾無制度可言可知，唔驚就有鬼。

最簡單一樣，唔計地下黨，中國共產黨黨員人數超過8,000萬人，佔中國人口6%，作為全地球最疊馬社團，又作為全中國最具「先進性」的政黨，唔知點解，連一個公開的官方網頁都冇，上去百度搜索一吓「中國共產黨」，最近磅的，只有人民網樓下的一個「中國共產黨新聞網」。

保持神神秘秘最大好處，就係政敵唔可以輕易滲透，好似香港民建聯咁，最少都有個網頁，網頁上面又最少有個「加入我們」可以下載「入會表」，近照一張加一嚿水入會費，就算冇介紹人，亦可以搏吓大霧做無間道。

要加入中國共產黨就絕對唔容易，根據2003年修訂的《入黨教材》，起碼條件係年滿18歲的工農軍人、知識份子和「其他社會階層的先進份子」，又要有「端正入黨動機」，由填寫冇固定格式的入黨申請、考察、培訓、政治審查、確定入黨介紹人、考察考察再考察，到最後成功踢入會，足足要過16關，唔怪得CEC國際(0759)主席兼阿信屋老闆林偉駿，三次申請加入中國共產黨都過唔到底。

根據中共組織部資料，至舊年的10時間，中共黨員人數增加2,600萬人，即係在乜都可以代表的理論下，入會已經容易咗好多，包括商家佬，自稱左仔的林偉駿入唔到會，可能中共在香港吸納會員的要求更加嚴格。

一個組織會員膨脹到近億人，既冇明顯的「階級敵人」，又冇一個講咗可以算數的政治強人，用簡單思維諗吓就知道，呢個組織要生存落去，制度化係唯一的選擇，你話中國共產黨乜都好，去到89年，每次權力交接都仲係必定流血，仲有個由一班老柴組成的「中央顧問委員會」阿支阿咗，近十幾廿年，至多係爭櫈仔不遂有一兩個極高層被爆樽，最低限度已經有少少「制度化」的脈絡。

舉個例，而家連是但一張美國報紙都識講，十八大呢個中國共產黨全國代表大會，係中國十年一次的最高權力交接遊戲，由中共總書記開始，到中國國家主席到國務院總理，以至由人民銀行行長到銀監會主席，國、黨、政，以至金融監管機構的話事人，差唔多都係2002年左右上位，做足10年，下一輪大執位，要到2022年的二十大。

不過呢個相對有脈絡可尋、十年一度的權力交接體制，查實只係進行咗一次，得10年貨仔，對上一屆的中共領導人江澤民，89年國際大氣候中國小氣候下上位坐到2002年，對上一任的總理朱鎔基亦只係做咗5年，即係話，對關心中國政治風險的投資者嚟講，最重要一點係，未來10年，係咪好似過去10年相對咁穩定，並冇絕對保障。

下回再續。

關連文章:
1. 老共BB班（上）｜（中）｜（下）

伸延閱讀:
1. 中共新聞網: 怎樣加入中國共產黨
2. BBC中文網: 十八大問與答
3. 中共新聞網: 特定歷史時期的獨特選擇 - 中央顧問委員會

間諜公司（下）

（刊於2012年10月15日am730)

金一南談中共間碟危機(由"1:50:45"開始)

上周上回講到，中興通訊(0763)及華為被美國列為「間碟公司」，擺明唔歡迎中國電訊設備公司在美國搵食，不過中國開始起4G網絡，一年內可能發牌，三大國控電訊公司，可能好似2009年搞3G咁，又要大量投資建網。

據《經濟參考報》上個星期引述中移動(0941)「權威消息人士」報道，中移動母公司的TD-LTE網絡基站已經差唔多起咗2萬個，明年再增加18萬個，資本開始可能達到1,800億元(人民幣)，如果報道屬實，有可能再出現2009年後電訊公司股價呆滯，電訊設備公司大把生意做的情況。

中國經濟放緩，不過相對已發展國家，仲有好多嘢要建設，仲可以靠加大公共投資帶動吓增長，近排開始加快二三線城市的市內地下鐵路輕鐵等建設、推動煤化工煤製油等項目，查實有啲似2008年全球信貸危機後的4萬億翻版，不過今次唔係純粹起路起高鐵，多咗針對經濟轉型的政策，4G網絡加快上馬，同埋大搞太陽能本地應用等，都係外國搵食被刁難，加大內需市場的大動作。

90年代初「蘇東波」後，蘇聯及東歐共產陣營瓦解，美國成為地球上唯一的超級大國，惡晒十幾廿年，鐘意打邊個就打邊個，可以唔理聯合國隊伊拉克，派軍隊直插巴基斯坦做低拉登(如果是真的)都仲得，而家中國開始有實力拗吓手瓜，美國佬以冷戰思維對待中國，將中興通訊等打成「中國間諜」，絕對可以理解。

站在美國立場嚟睇，美國最希望見到的，當然係中國好似當年蘇聯分裂一樣，西藏新彊台灣全部獨立，呢個局唔係陰謀論，而係客觀事實，當年冷戰期間，美蘇之間的間諜戰，比起越戰，激烈戰況可能不惶多讓，今日對手變咗係中國，絕對有理由相信，中國及美國等西方國家之間，一樣有好激烈的間諜反間大戰，美國有冇中國間諜，同你講冇，你信唔信？掉轉頭睇，同你講美國冇大派特派間諜去中國搞搞震，你又信唔信？假如中美之間存在間諜戰的推論成立，咁100年嚟一直係遠東間諜又堂的香港，又點會少得間諜滲透等各種情治活動，不過香港人唔係咁敏感咁解。

舉個好簡單的例子，話説2003年12月中，當時香港的熱門話題，講緊房委會分拆商業物業上市計劃，即係後來的領匯(0823)，受到司法覆核挑戰而撻Q，當日香港人個個掛住鬧董建華，有單本應超級轟動的新聞，竟然炒唔起。

話說當日香港某倒董不反中的大報，頭版大事報道，中聯辦秘書長蔡小洪，涉嫌長期為外國情報機構提供中國的國家機密，已經被有關部門查處，無幾耐，中聯辦通過中國通訊社的一個簡訊證實咗呢件事，後來蔡小洪被判坐15碌。當時中聯辦的編制，主任以下有個秘書長同6個副主任，蔡小洪即係中共在香港的「大內總管」，竟然被外國間諜收買到，可以見到，間諜活動在香港活躍，唔係陰謀論，而係客觀事實。

2003年香港亂過七國，當然唔可以直接賴晒西方間碟搞搞震，不過客觀事實就係，當年「23條」被扑低，董建華無幾耐就腳痛，中聯辦跟住聽講重組架構，北京亦全面重整香港政策路線，可以推斷，除咗CEPA自由等行表面上的中港融合政策，反間、情治、滲透等各種間諜性質工作，同時大大加強，香港從此多咗好多國產零零柒。

中又間西又間，自然通街無間道，表面上係鬚刨，其實係風筒，表面上係民主鬥士，其實係老共臥底，表面上係極左親共派，其實又可能係英美間諜。凡事由陰謀論去睇去分析，最後好容易鑽牛角尖，不過身處香港呢個遠東間諜中心，左搖右擺，邊個人向閣下講乜叫你做啲乜，作出情緒反射式的行動之前，最好先停一停，諗一諗。

關連文章:
1. 間諜公司（上）｜（中）｜（下）
2. 次輪好戲（下）

伸延閱讀:
1. 蔡小洪案背后的自由港諜影(資源來源不詳)
2. 經濟日報: 曾慶紅嫡系空降 中聯辦大改組
3. 星島日報: 「以法制法」遏港變天

間諜公司（中）

（刊於2012年10月12日am730)

美國佬國會查找咗年幾兩年，在冇任何具體證據之下，一句有古怪，認定華為同埋中興通訊(0763)威脅美國國家安全，「冷戰思維」又點，「有罪推定」又點，將件事推至國家安全的高度，封殺你就封殺你，講多無謂。

前蘇聯瓦解之後，美國佬獨霸全球十幾廿年，近年中國變成唯一可以拗吓手瓜的對手，Rambo打完越南阿富汗兼緬甸之後，怕且就快又要復出拍《第9滴血》打中國，從中興華為被開刀的經驗睇嚟，中美G2之間的磨擦，只有升溫唔會降火，中國公司要去美國搵食，恐怕未來十年都冇乜運行。

普通香港人無乜機會走去做間諜，身處間諜之都而唔會特別留意各方利益集團的滲透活動，美國佬對間諜的敏感，唔使問阿桂，正正源於自己本身日日夜夜做緊同一件事，美國近年打住反恐的招牌，監聽竊聽國內電訊網絡的間碟活動，之唔係大間特間。

全地球最巨型的間諜軟件(Spyware)，叫做「視窗」，佢老闆，裝咗微軟佢老闆蓋茨的Window，越嚟越唔得閒，日久日要更新下載乜嘢最新配套軟件，順叔都唔算係電腦文盲，懶得搞防火牆，成日被視窗的操作系統搞到成個電腦都係Trojan，強力建議中國政府如果搵間美國公司開刀還拖，唔該搵微軟。

從美國佬今次封殺報告的著墨，似乎主力打擊目標係華為，順手做埋中興通訊，華為冇上市，有機會再講，集中睇睇中興通訊，呢隻嘢係香港第一間先A股後H股的上市公司，而咁容易突破先例的公司，唔使問阿桂，概有啲嘢，後台有咁上下硬淨。

美國佬的調查，花咗唔少精神口水，要兩間公司解釋同中國政府以至中國共產黨的關係，包括兩間公司究竟係「國企」定「民企」。改革開放之初，在深圳特區跑出來的企業，特事特辦之下，國企民企點區分，有冇國有資產流失，真係雞同鴨講，舉個好簡單例子，平安保險(2318)究竟係國企定係民企？對於呢個問題，中興通訊答得好妙：「只有極少數有見識的人會將中興通訊區別為國有或政府控制企業」(Very few knowledgeable individuals in China would characterize ZTE as a state-owned entity or a government-controlled company) 。

中興通訊最大股東叫「中興新」，本身股東有國控背景，冇上市，控制權更加唔清楚，持有中興通訊30%股權，重點係，同平保一樣，中興通訊在股權結構上，唔似得中國人壽(2628)咁，7成股權由國有企業控制，阿公並冇絕對控股權，中興平保呢類公司，與其話「國控」，不如話「黨控」，例如中興通訊就向美國國會的調查委員會供稱，公司有個共黨組織，有19名黨委，當中2個同時係董事局成員，在中興通訊要求下，冇開名。

中國共產黨聽講有成8千萬黨員，多國英國人口，所有大型公司差唔多後面都有個黨委組織，如果因為高層係共產黨員就唔做生意，可能9成以上中美貿易要斬纜，中興通訊主要收入唔係美國，可以想像，反而唔少美國公司有興趣拍住中興通訊進入大陸市場。

唔做美國生意，大陸市場怕且仲有得做啩，2008年全球信貸危機之後，阿公除咗開水喉搞基建，派錢俾人買車買電器，另外一個大動作就係搞3G網絡，2009年初，中興通訊等電訊設備公司，股價反彈速度幅度，不亞於汽車製造商，當時電訊業啱啱完成重組，變成中移動(0941)、中聯通(0762)、中電信(0728)三大巨頭，大量資本開支投入搞3G，結果電訊公司股價殘咗幾年，到舊年開始先有返少少起色。

3G起步幾年，而家聽講又話要搞4G，順叔唔知乜係LTE，純粹將內地傳媒報道搬字過紙，LTE頻譜規劃會在11月左右出場，工信部部長苗圩亦講咗，以前講法係發4G牌照大約仲兩至三年時間，最近講緊一年之內發牌。

下回再續。

關連文章:
1. 間諜公司（上）｜（中）｜（下）

伸延閱讀:
1. Economist: Techno-nationalism isn't the answer
2. 經濟參考報: 中移動1800億啟動4G建設

間諜公司（上）

（刊於2012年10月11日am730)

先嚟一個同場加映，對間諜活動有興趣，應該買左面本《Spycatcher》睇吓，右邊係相關的Youtube視頻，英國特攻，唔係個個好似占士邦咁靚仔的．．．

今期開中興通訊(0763)。

首先聲明，財經茄哩啡係資訊科技白痴，至今拒絕愛瘋，網上興緊乜完全唔知，3G同4G有乜分別、TD-LTE同WCDMA係乜東東，更加一頭霧水，不過中興通訊及華為兩間中國電訊設備生產商，被美國佬開名指為間諜，可以攞正牌大噴陰謀論，喋喋不休話間謀。

即係咁，間諜呢家嘢，由上帝創造第一條女已經存在，夏娃做咗二五，搞到人類從此要在世間無間道煎熬，由阿當嗒咗啖禁果之後，由古到今，從中向西，間諜活動就無處不在。

明槍易擋暗戰難防，間諜往往係一場戰爭的決勝因素，好似十年前美國佬第二次打伊拉克，一堆堆歐美反戰人士衝咗去做「人盾」，後來美國傳媒報道，「人盾」當中，原來滲邊咗美國中情局間諜，去到收集情報兼收買伊拉克官員，成為戰事速戰速決的關鍵之一。

打仗時有間諜，冷戰更加要間諜，對歷史有少少認識的香港人，應該好明白，香港幾十年來，本身就係一個間諜中心，地理位置方便，易出易入，共產黨派間諜，國民黨派間諜，美國又派英國又派，如果話你知現在已經冇晒間諜滲透活動，你會唔會信，今時今日一個鋁窗跌落皇后大道中，分分鐘仍然會擲中一兩件間諜。

97年香港主權回歸之後，首任特首董建華，唔肯搬入前港督府，其中一個主要原因，聽講就係因為擔心英國佬留低太多間諜裝置，拆唔晒費事煩，拒絕搬入去做官邸，家陣到梁振英做行政長官，上任啱啱過咗100日，前港督府仲裝修緊，普通工程兩三個月乜都搞掂，家陣仲未搬得入去，唔通曾蔭權當日開P太多搞到前港督府爛熔熔咩。

成功反間，好多時作用又遠遠大過間諜本身，舉個例，假設閣下係某公司老闆，發現競爭對手派咗個間諜入嚟貴，閣下第一件事，當然唔應該做瓜個二五仔，而係特登放啲山埃料跣對手鑊金。從呢個角度睇，中興同埋華為，就算真係有在美國從事間諜活動，都唔係乜嘢特別高級機密情報，如果真係高科技到美國五角大樓或白宮要擔心的程度，投資者查實更應該對中興及華為另眼相看。

美國佬對國家安全好敏感，敏感到杯弓蛇影的地步，已經唔係新聞，好似早排美國總統奧巴馬就第一次以國家安全為理由，否決三一重工一間關連企業收購美國風電項目的投資，聽講因為有關風電場太接近美軍設施咁話。

再遠少少，十年前左右，美國佬亦曾經相郁和黃(0013)，理由類似係和黃控制咗巴拿馬運河的碼頭，而和黃主席李嘉誠又同北京好熟，有可能影響美國國家安全咁話，舊年維基解密曾經踢爆，誠哥為咗釋疑，曾經帶隊去美國約見當時的美國國土安全部長，甚至表示願意破格俾美國政府隨時核查公司帳目，以澄清同北京的關係，可見美國佬幾惡。

美國政客做華為同埋中興，已經搞咗年幾兩年，舊年11月以兩間電訊設備商，可能為中國情報機關服務，在通訊零件及系統植入間諜硬件軟件的可能為理由，正式展開調查，星期一發表正式報告。

財經茄哩啡查實好想開吓眼界，睇睇一啲電訊設備公司，在乜嘢位可以落焊，加入間諜裝置，不過打開份報告一望，認真大吉利是，由頭到尾，都冇講到乜嘢間諜科技，只係喋喋不休的質疑華為同埋中興兩間公司，同中國政府及軍方等有解釋唔清楚的關係，講到尾查實只係想得指向一個結論，唔能夠排除兩間公司做間諜的可能，威脅美國國家安全，呼籲同中興華為有生意往來的美國公司，考慮過主，並要求聯邦政府阻止兩間公司在美國的井購活動。

下回再續。

關連文章:
1. 間諜公司（上）、

伸延閱讀:
1. 美國佬插華為中興報告
2. AMAZON: Spycatcher - The Candid Autobiography of a Senior Intelligence Office

合景三兄弟（下）

照合景泰富(1813)所講，同廣州富力(2777)合作投得廣州獵德商住項目之後，主動邀請新地(0016)加入合作發展，到咗2010年初，新地開始在大陸市場再有動作，3個月內，斥資近80億元(人民幣，下同)，投得佛山兩塊毗連的大型商住地皮，今次掉返轉，新地搵合景泰富入股項目20%股權。

佛山項目規模唔細，加埋兩個太古城咁大，又係舊城改造，市政府交地時間長，有排都未有嘢睇。新地點解重注佛山，唔知，不過大陸玩磚頭係一個入廟拜神的行業，新地在大陸探路，出面的多數只係見到主席辦公室的經理錢炳輝，據佛山市政府網頁資料，新地搞佛山項目，竟然出動到郭老太鄺肖卿，可見呢個項目有幾重要，而呢個省招牌項目又竟然預埋合景泰富一齊玩。

2007年底新地入股廣州獵德項目，跟住公司管理層出現地震，原主席郭炳湘出局，新地內地業務亦沉寂咗兩三年，捲土重來都係搵返合景泰富合作，可見在新地眼中，合景泰富最少屬於「信得過」的生意拍檔，郭氏三兄弟鬩牆之後，相中合景泰富孔氏三兄弟，呢份信任更加有意思。

除咗新地，合景泰富亦有同置地合作，2010年底，近40個億投得成者的商業地皮，各佔五十股權，呢個「環球匯」項目聽講已經差唔多可以出街，有興趣上開去可以望吓，傳統英資加新興民企搞出嚟的地產項目係乜樣。

在廣州起家的地產公司大老闆，唔少香港散戶都好熟悉，因為曝光率高，例如恒大地產(3333)董事長許家印，大家對呢位前度「中國首富」唔會陌生，恒大同富力，都搞咗隊中超球隊，搞得足球，自然有好多免費宣傳同埋曝光機會，相對恒大及富力，合景泰富孔氏三兄弟非常低調，冇留意大陸地產的散戶，分分鐘將合景泰富同合富輝煌(0773)撈亂。

合景泰富群得香港地產商多，好學唔學，學咗好多香港所謂豪宅的浮跨之風，例如個樓盤名中間要加一點，斷開兩截先開心，又例如天乜天物大門小門咁，不過咁講，即係話你知合景泰富定位做高端市場，所謂精品豪宅，都叫做同一個行業同一個市場位置，合景泰富樓盤名的浮跨之風，最少冇在管理層上出現，好似SOHO中國(0410)老闆潘石屹咁，日吹夜吹魚蝦蟹，俾你做銀行大耳窿，你會放心借錢俾邊個管理層？

低調即係冇新聞，局外人冇乜公開資料去判斷孔氏三兄弟係咪「信得過」的債仔，不過新地及置地兩間相對謹慎的公司，在大陸發展都搵咗合景泰富做盲公竹，可以合理推斷合景泰富唔係一間亂衝亂撞的公司。

合景泰富同其他絕大部分中國地產商一樣，高負債，本帳簿唔方靚仔得去邊，至6月底，坐住約460億元資產，資產淨值約140個億，市值約120億港元，股票唔算特別吸引，現金近60億銀，40億元短期銀行負債，除非突然冇賣樓收入，冇即時流動性壓力，132億元長期債項當中，近一半係美元優先票據，當中2011年3月發行的5年期美元債券，年息12.75%，標迪所謂評級係「B1」，標普係「B+」，唔知佢哋講乜，大概係唔屬於投資級別咁，不過最新息率，根據彭博數據，已經炒到唔夠9厘，一手時間升咗成幾兩成，講緊2014年合景泰富有權贖回，現價買入可能要蝕少少價，即係話唔少投資者查實已經當信貸評級發嗡瘋。

合景泰富有冇機會爆煲，當然有，問題係成個中國千千萬萬間地產公司都面對同一個問題，加埋一齊，外國評級機構可以話佢係一個大得不能倒的道德風險，不過倒咗就全地球攬住一鑊熟咁解，銀行爆煲可能渣都冇，地產公司爆咗，當磚頭秤最少有咁上下斤兩，中國地產公司賣項目套現應急的例子都唔係咁多，如果冇估錯，好似新地置地的香港發展商，日日在求神拜佛大陸地產快啲爆煲，咁先有市場空間出現，咁先可以執平貨，合景泰富爆煲，新地分分鐘會食咗佢添。

關連文章:
1. 合景三兄弟（上）｜（中）｜（下）

伸延閱讀:
1.

合景三兄弟（中）

中國地產公司數目太多，是但搵一間出嚟講，有時唔知點入手，將兩間類似的上市公司拍埋一齊，睇幾年，印象可以更加立體。

合景泰富(1813)同中國奧園(3883)，有唔少相似的地方，大家都係兄弟班做大股東兼管理層，合景泰富有孔氏三兄弟，奧園亦有郭梓文郭梓寧兩兄弟。

合景泰富07年上市招股之時，據當時傳媒報道資料，有份圍飛的香港大孖沙，包括新地(0016)郭炳江、恒地(0012)李兆基、中信泰富(0267)前主席榮智健等，廣州行家富力地產(2777)的老闆李思廉亦有俾臉入飛；奧園遲3個月上市，更加係股市最旺的良辰吉日，基礎投資者陣容更加星光熠熠，當中赫然有新地當時主席郭炳湘的名字，本來著埋同一條底褲的新地郭氏三兄弟，投資內房股分道揚鑣，心水清者，當時可能已經聞到幾分兄弟鬩牆的味道。

兩間新晉內房股，集資額及市值規模差唔多，都係相對細細粒負債高，連發展軌跡亦差唔多同步，2006年在私募市場引入直接投資的策略股東，合景泰富搵咗摩根士丹利樓下間地產基金，奧園引入國泰財富(Cathay Capital)，齊齊槓桿再槓桿，咬地再咬地。

兩間公司咁多相同之處，不過跟手5年的發展就好唔同，唔好講其他，睇股價，合景泰富招股價7.28(港元，下同)，而家得返4蚊左右；奧園更慘情，5.2招股價，最新價1蚊唔到，潛水幅度高達98%，兩間公司的基礎投資者，仲有策略投資者，斷估暫時都未搵到窗口套現走人。

相對奧園，合景泰富股價相對硬淨，無需要變賣項目套現，在債市亦有一定融資能力，兩個管理層的質素，好難就咁直接比較，不過可以睇到一個比較突出的、客觀的分別，就係合景泰富在過去5年，周不時搵到有質素的生意拍擋，揸包括新地。

之前講過，新地第三代揸Fit人、郭炳江的公司郭基煇，07年合景泰富上市之時，在大摩打工，當時有乜份穿針引線，入股合景泰富做策略股東兼湊合景泰富上市，唔知，不過據新地自己公布的資料，郭基煇08年回巢新地幫手之後，職位係「項目經理」，負責香港及「珠江三角洲區域若干主要住宅及商業項目」，而新地在南中國發展其中一個合作拍檔，正正就係合景泰富。

新地在大陸搞緊邊科，公開資料唔係好多，地標式收租物業，暫時只係留意到上海國金中心及環貿廣場，內地業務佔集團整體比重更加唔高，例如住宅銷售，至6月底財政年度，中國分部業績只有4個億多少少，佔公司整體賣樓收益只係3%多少少，可見新地在大陸賣樓，好鍚住自己個招牌，做得好慢好細，未放手大搞，作為新地少數開咗名的合作夥伴，合景泰富資料披露當中，反而見到更多新地高層的腳毛。

新地在珠江三角洲算係比較活躍，不過土地拍賣場唔係咁多舉手， 2007年9月曾經參與競投廣東獵德村的商業項目，但係最後輸咗俾合景泰富同埋廣州富力的合營公司，地價46億元人民幣，投資額斷估最少100個億，兩個幾用後，呢個珠江新城最大地產項目，舉行乜嘢啟動儀式，出席嘉賓除咗合景泰富主席孔健岷、富力董事長李思廉，竟然仲有新地郭炳江，原來合景泰富及富力，邀請咗新地入股項目，據內地傳媒報道，三間公司各佔項目三份一權益，新地主要搞商場部分，當時郭炳江仲話，新地將來傾向以合作方式進軍內地房地產市場，搞到盲公竹順便偷師同時，可以分散風險，亦唔排除再度與獵德項目的拍檔合作咁話。

之後新地唔多覺同富力再行埋，不過合景泰富就繼續有往來，包括佛山的舊城重建項目，下回再續。

關連文章:
1. 合景三兄弟（上）｜（中）｜（下）

伸延閱讀:
1.

合景三兄弟（上）

今期開合景泰富(1813)，一隻相對冷門的中國地產股，主要講債券。

講到債務，就要先搵評級公司插吓。投資銀行的股票研究報告，好多時得啖笑，不過最少有啲參考數據睇睇，信貨評級公司的評級報告，順叔睇過冇一萬都有幾千份，可以好負責任咁講，絕大部份參考價值等如零。

投行分析員收錢寫研究報告，叫做受賄，要釘牌坐監，評級機構收錢俾信貸評級，叫做正當生意，甚至受法例及市場慣例保護；證券行冇一百間都有幾十，有競爭，分析員唔可以太過亂嚟，評級機構來來去去得幾間，做又卅六唔做又卅六，想搵個相反意見參考一吓都難。

由美國次按風暴，到歐洲債務危機，評級公司做緊預示風險的標誌桿，定係馬後大炮的攪屎棍，呢幾年大家都有眼睇，連歐美自己老巢都唔識睇，外國信貸評級公司睇中國的債務風險有幾叻，你話呢？

好似標普穆迪在過去兩年，日日在唱淡內地房地產公司，世界未日咁，唱到班地產老闆發債融資成本越嚟越貴，投行及信評賺到笑，暫時又唔多覺邊間爆咗煲；又好似早半年，香港新地(0016)郭氏兄弟被老廉請飲咖啡，股價插還插，標普穆迪又學人行出嚟將新地放人乜嘢「負面觀察名單」，結果變成股價明燈，新地股價已經差唔多收復失地，樓下隻新意網(8008)，唔覺唔覺，更加由一年低位反彈超過一倍，成為少數市值對資產淨值出現溢價的「包租公」，Google及蘋果等香港數據中心落成搶生意之前，新意網有可能繼續硬淨。

香港股市的內地發展商，以數目計應該係最龐大的上市公司物種之一，合景泰富市值120個億(港元，下同)左右，排名可能在廿名以後，當然就唔會咁起眼，不過最近有單新聞，吸引咗順叔去望多呢隻嘢兩眼。

話說在上個星期，合景泰富出咗張通告，講緊同滙豐銀行及渣打(2888)，分別簽咗兩份融資協議，前者借2.5億，後者5個億，都係定期貸款，冇講年期，亦冇講息口，不過其中一樣提及的條件，就係合景泰富主席孔健岷，同埋佢兩個兄弟，要繼續保持在合景泰富的大股東地位，否則視為違約事件。

內房股的債務風險被評級公司日唱夜唱，如果有留意開內房債，不難發現，香港的銀行好少正接借錢俾內地地產商，要去到中國海外(0688)的級數兼有國控股東背景，可能先在香港做到銀團貸款，今次滙豐及渣打借錢俾合景泰富，雖然涉及借貸金額只係幾個億，濕濕碎，冇指標作用，不過從公開條款嚟睇，香港銀行基本上因為信得過孔氏三兄弟，所以借錢俾合景泰富。

以公司規模計，合景泰富同香港新地，最少差廿倍，不過唔少嘢都幾似，最簡單嗰樣，就係公司控股股東及管理大權，都係串燒三兄弟包辦，孔健岷目前只有44歲，以內房老闆嚟講，可以話非常後生，三兄弟當中排老二，老大孔健楠及細佬孔健濤，年紀相差亦只係5歲，可見合景泰富的管理層，處於創業的衝刺階段，同97年時期的新地相似。

可能合景泰富三兄弟，一直向新地偷師，新地最高口號，叫做「以心建家」，合景泰富差唔多，打住個「以心築家，創建未來」的招牌。

除咗管理層結構及口噏噏的公司理念，新地及合景泰富查實真係有合作，合景泰富2007年7月初在香港上市，當時大牛事，幾乎冇人留意佢，不過聽講新地郭炳江以機構投資者身份，入咗一手貨，當年由摩根士丹利湊合景泰富上市，而郭炳江的公子郭基煇，當時正正在大摩打工，唔知道郭基輝有冇直接參與合景泰富的上市工作，不過可以肯定合景泰富孔氏三兄弟的名字，好出已經進入新地郭氏三兄弟的雷達當中。

下回再續。

關連文章:
1. 合景三兄弟（上）｜（中）｜（下）
2. 鬼佬看香港

伸延閱讀:
1. 明報: 低調「第三代」 現任項目經理

黑色黃金周（下）

近排中國既反日又反美，去香港又被人叫做「蝗蟲」，撞啱阿公要刺激內需，長假私家車免路費，旅遊點門票又話減價，幾億人空群國內遊，結果搞到全國大塞車，百達嶺變人肉長城，塞車塞人已經冇咗半個假期，可能因為行程安排失晒預算，加上大大掃興之下，自由行嚟香港的意慾都冇晒，令到中秋國慶黃金周的香港人流負荷大大降低，唔明白點解中國連國人放假都要規劃，硬係要乜周物周堆埋一齊谷人消費，如果自由行政策唔係開放得太快，超過香港容量的臨界點，香港的反陸情緒亦唔會咁有市場。

叉開少少講，呢個或多或少反映管治一個十幾億人口大國的困難，好似股市匯市，一放就亂，一亂就收，一收就死，仲未跑得出呢個惡性周期。公路同埋景點收費，係唔少地方政府收入來源，唔係好多人會諗，做大個餅人人著數，反而有唔少人，可能會特登搞多啲麻煩手續，例如拎住個免費通行證先可以出入，條路唔塞就有鬼啦，塞到天怒人怨，就有輿論壓力迫阿公改變政策，怕且長假免車費呢個負面因素，唔會困擾上市公路公司好耐。

除咗季節性因素，中國經濟向內需轉型的各種措施，例如降低消費稅，接近熱門名牌貨品國內國外的價格，放長嚟睇，會削弱自由行對香港經濟的作用，唔少香港地產商大搞內地投資物業，大型商場越開越有，租客組合可能同香港差無幾，個個名牌排隊在大陸開鋪，價錢又差唔多的話，冇乜需要山長水遠嚟香港血拼。

就算香港的土炮零售品牌，多得自由行，旺角銅鑼灣幾間舖頭已經賺到盤滿缽滿，食髓知味，齊齊在國內大肆擴張，好似幾間金業字號，例如周大福珠寶(1929)咁，在大陸個棚起到千幾二千間，主要收入仲係來自香港幾十間舖頭，千億市值究竟建基於大陸個雞棚，定係香港的自由行概念，會唔會得此失彼，條數到而家都唔知點計。

又好似莎莎國際(0178)咁，舊年開始「積極與知名地產發展商進行策略性合作」，在大陸開舖開專櫃全面踩油加速，似乎行緊周大福及六福(0690)等香港金業品牌的舊路，同樣係一個「莎莎」的招牌，放在香港同放在大陸，可能完全唔係嗰回事，更大問題係中國女士對化妝品要求開始同港女拉近，莎莎近年越嚟越似藥房，多咗賣日常用品同埋非處方藥品，行家卓悅(0653)更加賣奶粉加紅酒，正好證明賣化妝品賺自由行錢已經唔係咁容易，殺入大陸大搞情況就更加複雜。

有一隻冷門「自由行概念股」，幾乎已經被香港人遺忘，發展大陸市場之餘，唔需要點擔心香港市場顧此失彼，叫做冠忠巴士(0306)，主力做香港非專利巴士，近兩年主攻中港跨境巴士，收購咗幾個競爭對手，包括舊年在進智 (0077)等手上，3.3億銀(港元，下同)收購咗「中港通」，應該係過境巴士最大營運商，不過負債同時大升吓，上個財政年度同時停止派息，防守能力打咗少少折扣。

冠忠巴士市值大約6個億，純利大約1個億多啲，舊年業績倒退，主要因為投資大陸公交有5千幾萬應收款項撇帳，即係話大陸市場難做，管理層已經講明可能出售有關業務，深圳自由行一簽多行政策彈弓手，一場歡喜落空，不過自駕遊的負面因素亦同時剎停，打個和，集中做中港跨境交通的話，唔會差得去邊，5倍市盈率左右，可能係平通港九的「自由行概念股」，不過交投接近零。

冠忠巴士第二大股東叫做新創建(0659)，大股東黃氏家族幾位執行董事，個個都五張幾六張，暫時未見第二代進入董事局，反而新巴城巴代表坐咗兩個，以新世界發展(0017)乜都鐘意做的公司性格，冠忠巴士存在一定賣盤因素。

關連文章:
1. 黑色黃金周（上）、（中）、（下）
2. 巴士大典（上）、（下）

人肉長城

唔怪得香港冇自由行了．．．

黑色黃金周（中）

一年近二千萬內地遊客入境，當平均每人留在香港三日，粗粗地除開，等如每日都有十幾二十萬內地遊客在香港旅遊消費，令一個本來已經飽和咗的市場，突然出現結構性的增長。

將部分典型的「自由行概念股」，例如賣化妝品起家的莎莎國際(0178)，撳個十年股價圖出嚟，可以反映自由行呢個政策，對香港消費市場的深刻影響。2003年中莎莎股價，5毛港紙都冇，而家在5元(港元，下同)樓上，唔計派息，10年升10倍，唔計槓桿效應，回報遠遠跑贏SARS價買中價樓。

不過莎莎等香港零售公司，股價普遍在過去5年先開始大爆發，除咗自由行政策大規模在全國各地普及，仲有中國匯改及股改兩個重要因素。

2005年中人民幣匯改之後，價值長升長有，到2007年1月，人民幣兌港元，突破「一算」，港人北上消費的潮流，開始逆轉，今日100蚊人仔兌123港元，多得聯繫匯率，內地同飽嚟香港掃貨去澳門賭錢，變相有七五折優惠；除咗匯改，2005年左右中國監管機構亦啟動咗股改，大量原本非流通的內資股國有股，變成流動資產，唔少人櫃統底的廢紙公仔紙，忽然變成有價有市的股票，當年大量所謂「大小非」解禁之日，亦係香港樓價脫韁之時。

內地遊客多咗，有錢咗，購買力仲要因為香港聯繫匯率升晒呢，香港零售市場又點會唔旺，至2007年3月底財政年度，莎莎收入27億元，對上一個財政年度，已經增加至64個億，年均複合增長率接近20%，最新市值接近150億銀。

趨勢終會有轉向的一日，中國股市製造財富的能力，已經隨住A股的大幅調整，近兩年已經大打折扣，講到人民幣匯價，亦唔係個個地球人都單邊睇好，連前金管局總裁任志剛，早排都跳出嚟講聯繫匯率係時候檢討，就知道人仔購買力過去5年的強勢，未必可以頂到2017年。

莎莎長年坐住大嚿現金派高息，近兩年派息比率雖然略為縮皮，不過女人錢點都易賺啲，股價相對硬淨，但係其他「自由行概念股」，例如鐘表及珠寶零售業，舊年股價已經唔係咁企得穩，幾乎間間公司年報的主席報告書，都同你講緊內地遊客的消費習慣甚至購物意慾，都在改變緊，生意冇以前咁好做。

以前旺丁又旺財，而家簡單到內地遊客的數字，好似都已經出現盛極將衰之勢。

根據入境處資料，2011年的「十一」黃金周，內地訪港遊客數目77萬人次，按年增加超過16%，據傳媒引述香港旅遊議會估計，最近地反日情緒高漲，有好多原本跟團去日本的廣東客，會改變行程來港，加上全國公路在黃金周免費過路，亦會鼓勵內地遊客自駕遊到深圳再嚟香港，所以預計今年「十一」黃金周，訪港內地旅客數目會再按年增加逾20%，達到破記錄的百萬人次。

不過單單計算10月1日的假期，入境內地客只有12.5萬人，仲少過舊年同日的13.3萬，呢個數字查實好有象徵意義，唔怪得星期三香港長周未假期後開市，「自由行概念股」跌到一仆一碌。

好簡單咁睇，自由行實施近10年，最有消費能力的一批內地人，怕且已經嚟咗香港十次八次，甚至做咗投資移民拎埋香港身份證，冇乜需要好似有今生冇來世咁，次次落到嚟同你血拼，近排多咗新聞講內地遊客足跡，開始由酒店漫延至效外營地，未必一定係為咗慳錢，更可能係內地遊客及消費者的追求已經出現質變，以前吓吓殺入名店，而家開始識得欣賞香港的大自然，呢個查實未嘗唔係好事。

當然啦，香港近年熱炒的「反蝗論」及反陸意識，內地人查實好易感受到，例如一簽多行彈弓手，水貨客在上水被趕絕咁，大家上去大陸的社交網站，好容易察覺到內地人對香港抗陸意識的感受。

下回再續。

關連文章:
1. 黑色黃金周（上）、（中）、（下）
2. 文明中旅（上）、（下）

怪獸傳媒（續集）

壹仔本來話洽售緊台灣印刷業務，牌底未開估，賣甩台灣電視業務，作價近4億港紙，應該係設備價，斬咗條大盲腸，剩低的印刷業務，無論會唔會賣，都唔係咁緊要了。

最新市值比較: 東方報業(0018)，19億；壹傳媒(0282)，21億．．．

關連文章:
1. 怪獸傳媒（上）、（中）、（下）

伸延閱讀:
1. 中國時報: 黎智英道歉 員工秋決 一個個被通知走人

黑色黃金周（上）

今期開自由行，同埋幾隻靠自由行食糊的香港上市公司。

十月一日前後一個星期，向來係香港零售業的消費旺季，今年疊埋中秋佳節，大陸有長達8日的「黃金周」假期，香港亦有4天「長周末」，本來應該旺上加旺，不過天不時也，人不和也，難以想像，同一天空下，這邊東方之珠廿幾分鐘煙花璀燦，那邊維港水域永沉數十亡魂，本來已經冇乜喜慶味道的黃金周，更加盡抺黑色。

順叔絕對冇意在呢個時候抽邊個水，不過在追月夜國慶日，發生可能係香港歷來最嚴重的海上災難，肇事兼被撞沉的船隻，又掛住「港燈」個招牌，望住呢單海上慘劇，好難唔放埋同香港的運數一齊咁睇，越諗越唔安樂，冇晒心機。

冇晒心機的，肯定唔單止係財經茄哩啡。就算在慘劇發生前的兩日假期，平時被自由行旅客淹沒的購物旺區，人流竟然唔見得特別多，名店門口冇內地貴客排隊，大型商場唔算特別擠迫，甚至有啲冇厘神氣、「冷冷清清」的感覺。順叔多數避人流特別多的地方，以上觀察，只係9月30日偶爾路過銅鑼灣的「快拍」感覺，唔作得準，不過問開身邊朋友同埋屋企人，好多人都有類似感覺，就係在今天特別長的國慶假期黃金周，被香港拒內抗陸人士稱為「 蝗蟲」的內地遊客，竟然好似特別少，相信唔需要等政府公布10月零售數據，過幾日有關政府及商業團體的初步數字及口風，可以印證呢個「冷冷清清」的感覺有幾實在。

內地遊客人流冷冷清清，挨緊貴租的零售商就更加淒淒慘慘戚戚，查實幾個月前的內地「五一」長假，好多人已經講緊黃金周的威力開始甩色，過去幾年靠內地客食糊保持高速增長的香港零售業，近幾個月已經開始放緩，7月份的零售數據更加接近3年新低，自由行呢個實施接近10年的「生金蛋」政策，威力明顯開始減弱。

將時間回撥到10年前，2002年10月1日，香港主權回歸5年，特首叫做董建華，政府啱啱公布就基本法23條立法展開公眾諮詢，香港經濟已經連續通縮5年，樓價較97年高位跌咗超過一半，一個月後政府將會推出「孫九招」穩定樓市，兩個月後廣東省開始因為怪病出現搶購白醋潮，當時100港紙仲兌到百二蚊人仔，香港講緊結構性財政赤字，港人大量北上消費及工作，唔少人開始擔心會令香港通縮及財赤進一步惡化，斷估乜嘢中港更緊密經貿關係安排(CEPA)同埋自由行的政策，就係在呢個時候蘊釀成形，2003年SARS重創香港旅遊及零售業，仲有50萬人上街，就催化咗一系列有關河水溝淡井水的政策。

2003年7月28日，第一張在自由行政策下發出的「往來港澳通行證」，在中山發出，從此內地人必須跟團遊港澳的政策，變成歷史，最初只有4個廣東城市開通「個人遊」，一簽一行，而家已經開放到49個城市，如果唔係香港的反對聲音，仲有實實在在的香港「容量」問題，一簽多行同埋自駕遊等政策都可能已經落實，不過就算只係自由行政策，2011年已經為香港帶嚟超過1,800萬內地遊客，佔訪港旅客大約65%，過去10年加加埋埋都有8,000萬自由行訪港旅客。

十年一夢，睇返2012年今天的香港的政經形勢，同2002年10月的時候，好多嘢都可以形成強烈對比，甚至隱約見到兩極分化的發展趨勢，例如樓價，如果唔係非典一役，2002年第4季樓價可能已經跌定，如果當時係谷底，而家就好有高處不勝寒的感覺，又例如香港同內地經濟融合的政治形勢，當時主流輿論支持加大力度同內地合作，而家抗拒中港融合的聲音，就算唔係主流，不過最少係最大聲。

下回再續。

關連文章:
1. 黑色黃金周（上）、（中）、（下）
2. 文明中旅（上）、（下）

乾溏小鴻海（下）

鴻海成個集團，包括香港上市的富士康國際(2038)，有過百萬人幫老闆郭台銘打工，廉價勞工密集，好似出事的太原廠，閒閒地十萬八萬人，生產線的轉移往大陸，帶動內陸省市城填化，打公仔唔再需要穿州過省落深圳打工，有乜唔順超返鄉吓都容易啲，亦即係話，鴻海降低咗「生產成本」同時，新一批員工劈炮唔撈的「機會成本」亦大大降低，更容易拍拍屁股走人，更容易企起身反抗過度剝削，鴻海的生產大軍變得更唔穩定，管理更難。

近年大陸的勞工市場，每逢見到富士康或鴻海大舉請人，就知道美國蘋果好快有新型號出街，山西省傳媒今年3月已經報道過，鴻海攞咗愛瘋快的大單，即時要請2萬新工人，臨時拉伕，模式同香港建築業勞工供應的判頭制已經冇乜大分別，邊個有大單就大量請人搶人，周不時出現大量的勞動力缺口，好多時要出動到地方政府出面，層壓式要下面市縣級政府幫手請人，好似鴻海太原工廠，請咗大量山東及河南工人，更加容易因為地域主義出現「群眾事件」。

當然啦，「鴻海」及「富士康」兩牌招牌，多得之前的員工連環自殺，已經洗唔甩「血汗工廠」的味道，更成為勞工權益的最有影響力反面教材，新一批民工，講緊好多90後，唔似得上一輩咁任勞任怨任打任捱，鴻海等工廠老闆，如果掟錢唔夠毫，類似太原單一工廠的「群眾事件」，肯定陸續有來。

一部愛瘋快當賣5000蚊港紙，如果蘋果賺500蚊，鴻海可能只係賺5蚊，甚至更少，所以要用規模搭救，用錢掟工人會壓縮所剩無幾的毛利，過份壓窄生產力又會引爆社會或政治炸彈，一句到尾，就係一盤不可持續發展的生意，「代工」查實係已經落後的經濟發展模式，鬥胆正命平，亦係中國所謂「經濟轉型」最想擺脫的發展模式。

鴻海做代工做到最大，主要隨身個人電子物品，乜都袋，都有一個好處，最少唔使點擔心客仔的產品被市場淘汰，一雞死一雞鳴點都有生意做，不過富士康國際叫單飛，Nokia被蘋果及三星打到變豬頭，富士康國際亦冇得撈嗱，越嚟越乾溏，近幾年差唔多年年見紅，啱啱爆發騷亂的太原廠房，就係舊年賣俾鴻海，生產線繼續縮水，上個月公布半年成績表，又係蝕兩億幾美金，市值仲有200億港元，股價其實絕對未算殘。

鴻海成個集團，唔係冇賺錢能力，最近仲話大舉進軍光伏產業，執吓平貨，不過在系內分工分餅，面對最大轉型壓力的富士康國際，暫時仍然只係含住條豬頭骨， 最弊公司透明度接近零，年年都話「專注智能手機市場新客戶」，「研發投資實起作用」，大佬，阿水都話識得自制工業革命，究竟你想點啫？

富士康國際主席，唔係郭台銘，而係一個叫陳偉良的香港人，當年為咗Nokia呢個大客，全家搬咗去芬蘭，終於拎到大單，造就富士康國際2005年上市前後的幾年黃金時期，市值一度接近二千億港紙，幾年時間做咗一個「小鴻海」。

富士康國際上市之後，鴻海冇話點賣舊股套現，亦冇乜發行新股集資，最多因為行使認股權先出現股本變化，似乎富士康國際在鴻海集團的最重要角色，係要獎勵好似陳偉良呢類高層，對於母公司嚟講，好似可有可無咁， 陳偉良舊年唔再兼任行政總裁，新官程天縱上任，唔夠一年，早幾個月又劈炮，聽講因為本來想搞自己品牌，但大老闆郭台銘反對，結果要反枱。鴻海系管理過百萬工人已經一頭煙，系內高層的關係亦似乎今非昔比，挾在中間的富士康國際，越嚟越似一個孤兒仔，公司大幅提高透明度之前，投資價值接近零。

關連文章:
1. 乾溏小鴻海（上）、（下）
2. 鴻海迷航（上）、（下）

伸延閱讀:
1. 視頻: 郭台銘訪問（上集）|（下集）|（文字實錄）
2. 中國經營報: 河南巨額補貼助富士康招工
3. 商業周刊: 陳偉良兩年創造小鴻海

乾溏小鴻海（上）

今期開富士康國際(2038)，曾經何時被稱為「小鴻海」的香港藍籌。

家吓全球市值最大的公司，叫做蘋果，美國做愛瘋捱劈嗰間，市值盛惠6,300億美金，中石油(0857)加中移動(0941)再加中國銀行(3988)，三大巨型中字號巨企攬埋一齊，先有呢隻蘋果咁重磅，你話佢值唔值咁價都好，一個iPhone瘋靡全球，從此香港人搭地鐵要耷頭縮膊拗壞頸椎在所不惜，仲用緊Nokia乜叉乜零冇What’s App等如冇朋友，由Window到Google到iPhone，都係一個消費產品改變人類生活甚至生命模式，不得不配服美國佬的創新能力，中國唔想在第三次工業革命重演100年前命運，有排追。

蘋果最新產品，叫愛瘋快，蘋果新教主 Tim Cook在美國時間今個星期一，發表一份萬眾矚目的聲明，愛瘋快推出市場3日，第一批超過500萬部愛瘋快已經賣清光，佢又話正竭盡所能，務求令所有想愛瘋快的顧客，盡快一人有一部咁話，可能愛瘋教主勢估唔到，就喺呢個時候，蘋果最重要的iPhone代工其中一個大型生產基地，啱啱搞到一鑊泡要停產。

話說中國時間星期日晚，富士康國際母公司鴻海科技在山西太原的廠房，爆發大規模騷亂，據大家估估吓的數字，有2,000人扎馬，參與人數及傷亡數字，斷估冇乜人知道，不過根據官方傳媒講法，出動到5,000武警平亂恢復秩序，場面都應該好哄動，話佢係建國以來在單一企業爆發的最大規模「群眾事件」，都唔算過份。

出事之後，鴻海發言人話老闆郭台銘已經即飛到太原坐鎮善後，出事工廠唔負責組裝愛瘋快，唔會影響出貨咁話。攞棍扑，效率又點及得上用錢掟，聽講鴻海即刻派發加班費，工廠「放假」一天就恢復生產，繼續流水作業。

鴻海的生產線應該高度精細有效率，系內各公司點分工，資料披露就真係得「呸」一聲，就算富士康國際，相信冇乜邊個散戶講得出做乜，有意冇意間，保持神秘感，就好似佢老母鴻海的工廠咁，保安高度嚴密設防，工人進出都要搜勻全身，聽講被發現身藏任何金屬物料，即炒冇情講，避免好似蘋果呢類大客仔的商業機密外泄。

不過鴻海過百萬員工，請得咁多人，即係入職都唔會有乜嚴格要求，肯做步捱就得，所以斷估工廠裡面，永遠潛服咗唔少競爭對手派嚟的無間道，早幾年十幾個員工跳樓自殺之後，連勞工權益組織及國內傳媒都經常派臥底入鴻海或富士康工廠，污嘈嘢又變得好易曝光。

好似爆發騷亂的太原工廠，只係八月底，上海有份晚報就派咗個記者仔做臥底，踢爆太原工廠有份生產愛瘋快的后蓋，臥底記者被分派到的生產線，只係將手機蓋的音量孔用貼紙遮住，方便下一道的噴漆工序，工作細份簡單，但係做到冇停手，一日十粒鐘，一個人已經要處理3,000個愛瘋快組件咁話。

報道出街唔夠一個月，太原工廠即爆大鑊，鴻海話最新反日情緒高漲，部分後生仔將敵意發泄在同日本Sharp有密切生意來往的鴻海，不過大陸社交網站最流行的版本，講緊工廠保安在出事當晚，狂摳一個山東工人，激發山東幫老鄉還拖，搞吓搞吓，河南幫都加入戰團。富士康太原工廠接近8萬個工人，保安千幾二千個，做得工廠保安，多數都係本地人，即係山西幫，唔使問阿桂，成件事同中國特色的地方主義好大關係，同聲同氣的工人分幫分派，擦鎗走火好易變成「群眾事件」。

咁就帶出一個更大問題，好似鴻海呢類聘請大量廉價勞工的工廠，近年大舉北移內遷，已經改變咗流動人口的暗流，成個勞工市場結構改變晒，鴻海要在內陸複制又平又勞工密集的生產線，同時要面對全新的管理問題。

下回再續。

關連文章:
1. 乾溏小鴻海（上）、（下）
2. 鴻海迷航（上）、（下）

伸延閱讀:
1. 新聞晚報: 富士康太原廠臥底10日

Marriage Bounty

5個億，港紙，法官大人，呢件．．．

趙世曾把口唔收，口快快一句，變咗國際新聞，怕且條友呢世人都未試過咁出名，既然係咁，財經茄哩啡都唔爭在加把口，挑，5個億，精蟲佢都唔知出唔出到啦．．．

伸延閱讀:
1. 哈哈哈哈哈: Pray the Gay Away ?!愛瘋鴨．．．

五毛不值

比亞迪	樂天虎

里昂呢位樂天虎，中文名夠晒猛，聽講係「亞洲最佳分析員」，整份報告，認為比亞迪(1211)5毛子都唔值。虎哥的論據，例如在「四年十萬里」有壞包換保養承諾之下，電動車賣1,000架，換電池成本幾球嘢，全部都係合情合理的，12個月目標價呢，都係嗰句，12個月內只要改一次，就永遠唔會錯，唔使咁認真，3年前，虎頭睇緊98蚊。

不過，份嘢既然在9月25日出街，就放上嚟做過記念，一兩年後再睇吓，有乜事會發生．．．

關連文章:
1. 飆凸你的夢（上）｜（中）｜（下）

伸延閱讀:
1. 下載: 虎哥報告
2. 思想花園: 比亞迪的國企病

忠奸中間人（下）

田生集團(0183)專門幫發展商起釘收樓，比傳統地產經紀收多兩個佣，不過如果用市盈率比較，美聯集團(1200)往績市盈率有24倍，田生集團得7倍鬆啲，或多或少反映咗收樓中間人呢盤生意，冇咁穩定。

田生集團業務模式夠晒獨特，做中間人好多嘢又唔可以講清楚，成盤帳簿就唔可以當係一隻典型地產股咁睇，好似去到舊年6月，手頭現金突然由2億幾(港元，下同)增加到超過7億銀，不過短期負債上面，同時有嚿「預提費用及其他應付款」，總值14個億，一個咁大嚿又咁生面口的項目，反而冇註腳解釋，純粹靠估的話，好可能係發展商預先科水俾田生地產做收舊樓的彈藥，當然啦，最後項目做唔成，亦唔代表田生需要坐貨。

田生集團從來唔會透露幫邊個做嘢，不過如果將佢網頁上面，近期及以前經手收買的項目的地段位置，同之後出現的樓盤對照一吓，就知道呢間舊樓收買佬同邊個最熟，舉個例，筲箕灣而家新地(0016)個譽都，即係iUniQ，就係田生幫手收返來，可見呢位中間人都拉到大客，至於佢收到發展商柯打先做嘢，定係收到七七八八四四六六先搵大孖沙兜售，就無從估計。

之前幾年香港樓價爆升，唔計2008年第4季至2009年第1季半年，坐咗貨可能嚇到鼻哥窿冇肉，不過田生集團既然有起釘收樓的能力，如果大膽少少，就算冇開發樓盤又唔識得發水秘笈，成個樓盤收咗強拍再轉賣俾地產商，賺物業差價而唔係收服務佣金，可能已經發咗，又用返iUniQ做例子，2008年新地收個盤返來，2億銀唔夠，舊年掟出街賣，聽過一炮沽清套現8個億，又即係話田生收樓夠晒薑，但係做生意唔係咁胆生毛，一次生兩次熟，如果意外，田生好可能會自己搞一個半個細盤玩吓。

查實全香港大小地產商，在強拍門檻降9成降至8成之後，好多人都打緊舊樓主意，同樣係舊樓收買佬，金朝陽集團(0878)斷估冇乜做收樓服務，唔係中間人，最多成個地盤賣出去當炒地皮，金朝陽本身做開地產發展，有一定專業知識及經驗，近年在港島舊區都做咗幾個重建項目，或者收樓手法比較正路，冇乜話聽到會在阿婆屋企對面掛幅巨型不知名畫咁得意，亦冇大地產商在背後做財力支持，所以項目唔算多，早排宣布同恒地(0012)聯手強拍大坑禮賢街重士街項目，唔知邊個佔大份，似乎係個個地產商鬥打釘起釘，撞埋一個盤就不如齊齊發展。

金朝陽本身亦有做商場寫字樓，例如銅鑼灣的金朝陽中心，雖然零售舖位唔多，不過勝在夠中心，對住九倉(0004)個時代廣場，至舊年底財政年度，金朝陽中心租金收入1.9億元，睇吓點計喇，粗粗地5厘，估值都有38個億，等如公司最新市值，在小型地產公司當中，算係一個被忽略的包租公，霎東街及耀華街項目完成之後，有可能好似早排的希慎(0014)，估值提升幾格。

講到舊樓收買佬，唔可以唔提吓偉大的市區重建局，香港最大型的土地供應，唔計新界，就要數市區重建，即係話市建局查實手握最大的潛在樓面供應，不過政府做市區重建，阻力分分鐘仲大過發展商強拍，首先要顧及保育，保育對象包括實實在在的古跡及有時未必個個一樣的集體回憶，唔係樣樣話拆就拆，更高難度就係要自負盈虧，當自己係間地產公司咁營運，咁就出現咗好似前政務司司長唐英年所講，起埋晒啲「華而不實貴到無倫」的樓，亦好難扮演土地供應中間人的角色。

市建局真正的作用，查實應該係做一啲好似觀塘的超大型重建項目，令一個舊區改頭換面，市建局手腳慢，各大小地產商已經搶住做，搞到市區一楝二楝香雞型的蚊型樓，唔三唔四，增加市區重建的難度及可塑性，家陣香港任何土地規劃的吋步難行，開拓新界難，市區重建又難，世事冇咁完美，二擇其一的話，市建局睇怕要嚟多次大變身。

關連文章:
1. 忠奸中間人（上）、（中）、（下）