Best Blogger Tips

2012年8月2日星期四

變型金礦(下)

柯。。。柏文。。。麥加登。。。

上回講到,作為港股當中變身最快最多的國際資源(1051),近幾年終於冇得變住,放棄在馬達加斯加掘黑金,游過去印尼蘇門答臘開金礦,買咗個轉手多次的Martabe 金銀礦,挖足三年,上星期終於掘到,管理層即刻上演大戲,抬住嚿金影相派通街,又四圍接受傳媒訪問。

一個礦無論蘊藏量幾豐富,礦主幾好賺、採礦成本高低,取決於表面的廢石礦層有幾厚,去到黃金礦床要鑽幾深。

紫金礦業(2899)個紫金山,當年出名成本低易開採,紫金公司網頁記載咗一個典故,話說在1997年底,紫金曾經用過千噸炸藥,將成個紫金山頂炸開,爆破移走的山體量,超過100萬立方米,等如10隻巨型航空母艦,從此紫金山可以露天採礦,不過呢,用炸藥粗暴扭轉百萬年的自然之力,紫金山成個山體亦變晒,呢間曾經被中國國家副主席習近平(當年做緊福建省省長)公開稱讚「效益好、環保有創新」的中國第一金股,近年經常出現高污染奪命事故、砂霸崩圍咁,極可能就係當年(及多年來)透支大自然的咭數。

近年全地球環保意識高咗,唔係個個國家只求經濟增長,妄顧子孫福祉,正正經經由零開始建立一個礦場,難度唔細,好似中信泰富(0267)咁,在澳洲個鐵礦2006年已經買咗返來,搞到今日都仲未投產,成本超支仲要一超再超,

中信泰富可以話係中信集團的「面子工程」公司,成隊國家隊照住,澳洲個礦艱苦經營6年都未投產,國際資源個金礦,規模當佢只係十份之一,但係亦需要由零開始建立管理、鑽探、工程團隊,呢頭啱啱先掘嚿金出嚟,嗰頭管理層又同傳媒講,要擺脫「只此一礦」的經營模式,要收購亞洲其他金礦項目,仲要係取得控股權攬晒上身嗰種,老實講,掘幾十萬盎司黃金上嚟先講嘢啦。

印尼蘇門答臘掘金,政策環境,好似紫金當年「福建第一爆」咁胆正命平又有政府高官力撐,定係好似澳洲咁諸多限制工會又麻麻煩煩,最好搵啲印尼華僑問吓。不過呢,有啲公司,研究太多係多餘的,印尼的礦務政策、環保監管、勞力保障、外匯風險、政局變化,順叔冇諗住花時間樣樣調查。

可以咁講,除咗公司名帶住「資源」兩個字的,大家亦可以留意吓有幾多間公司個名有個「礦」字,斷估唔過百都有幾打,應該係內房股之後最熱門的香港上市公司種類,內房股大部分仲賺緊錢兼有息派,一眾變型金礦有幾多間有錢賺,可能一隻手數得晒,一間可以話例外,幾十間就唔會是偶然,最少可以推出一個結論,就係「炒礦」好搵個「開礦」。

如果只係想對一間公司攞個「感覺」的話,最簡單直接就係望吓管理層坐住乜人,唔識國際資源主席趙渡,又唔識邊個係Owen Hegarty,好彩仲有個前滙控(0005)恒生(0011)大班柯清輝。國際資源當日揾柯大俠入局的消息公布後,股價單上爆升幾十巴仙,於是出現「柯清輝」三個字已經值廿個億之說。

一個導演如果同幾個演員合作開,主角又好茄哩啡都好,唔會希望個班底的成員,接其他戲接得太爛,拍到Cheap晒,可能「柯清輝」呢個品牌太好,人緣又廣,個個爭住碌佢張咭,唔做銀行大班之後,反而大把世界,國際資源之後,又接拍中策(0235)蛇吞象南山人壽的大戲,最近思捷(0330)一眾台前演員大地震,柯大俠又捱義氣自己坐正,呢三間公司加埋,散戶點都有個「感覺」啩。

「柯清輝」呢個品牌賣得,因為37年銀行大班的經驗唔係講笑,工行(1398)都搵佢老人家頂梁錦松個非執董職位,滙控呢排被人告到甩褲,又涉嫌操控倫敦銀行同業拆息,又話涉及洗黑錢,好彩柯大俠走得快。

銀行非礦洞,何處惹塵埃,金融世界到爛泥石坑,世間竟無淨土。

關連文章:
1. 變型金礦(上)(下)
2. 思捷女屍(續集)
3. 柯大俠盜(續集)

伸延閱讀:
1. 名字帶「礦」、「能源」、或「資源」的公司

2 則留言:

  1. 『最少可以推出一個結論,就係「炒礦」好搵個「開礦」。』真系一語中的。

    股票債卷投資工具比礦容易查數,又要有信用評級,你賣礦吹下水就話有幾多值幾多。各國現時都在量化寬鬆,散戶大家一窩蜂去買金,總有幾個水魚會買個礦翻來當古董擺。

    回覆刪除
  2. 國際資源真仆街!小弟0.54入了好多,等左几年,跌完可以再跌,再跌就好快玩完。各位师兄请指教。。

    回覆刪除