2014年3月21日星期五

呃你孖孖

「文化商人」遇上「以為自己是文化人的企管人」

今期開文化中國 (1060)

公元2014年3月12日,天方夜談,文化中國溝阿里巴巴,諗住變變變,芝麻開門,一嘢變咗呃你媽媽,幾毫子炒上幾蚊,文化中國市值一度炒到超過700億(港銀,下同),跟手一路派貨,越派越有,全日55億成交,撲入散戶非死即重傷,全城坐艇,媽媽有聲。

搭個棚、作個故仔、再剥師奶條底褲的股壇大龍鳳,每日上演,講緊做得有幾過份,食到有幾盡咁解。文化中國一場大茶飯,聽講有大戶賺咗十個億計,不過盲衝衝高位接貨,家陣蟹綁在文化中國的游資,大大話話亦有十幾廿億,殺孽咁重,搞到唔少細價股炒股都冇啖好食,累街坊。聽講唔少中環古惑仔,㷫過火屎,四出刮料,好想知道文化中國呢舖大茶飯背後,是何方神仙過路,竟爾寸草不生。

文化嘅嘢,財經茄哩啡識條春咩,不過,有一位財技高手,乃「文化人」加 投資銀行家再喪搭事事評論員的混合體,深諳文化中國管理層的思路套路,講到品評呢場文化大龍鳳的資格,掉佢其誰,呢位財技高手就係... 就係...

登登登登!各--位--觀--眾:精電(0710)行政總裁,蔡東豪哥哥!

Yeah。

是咁的,文化中國主席,叫董平,阿董生好威,堅威。如果將大陸電影分為國營同民營兩邊,國家隊的大佬叫韓三平 (啱啱被退休),另一邊的教父式人物,就係董平,冇在董平的電影出現過,都唔好叫自己做大導或者一線,董生的杰作包括《臥虎藏龍》、《讓子彈飛》,仲有同周星馳爺爺合作的《西遊》咁。有人叫董平做「中國民營電影教父」,不過董生好謙,只係將自己定位做「文化商人」。

大陸電影商業化,唔夠廿年,文化喪溝股票,經驗更青澀,十年前唔係咁多人識玩。將文化工業同資本市場結合,打破意識形態禁忌,董平乃第一代推手,帶呢位「文化商人」登陸香港股市,授以搭棚秘術、財資技法的,正正就係蔡東豪哥哥。

話說2004年底,阿蔡生去咗友利(0419)呢隻經典殼股做董事總經理,月薪一皮,打破香港上市公司最低工資記錄,才子賤價下海,全城跌碎眼鏡。原來東豪BB忍辱負重,重要任務幫董平間華億,借殻上市。於是「友利」變身「華億新媒體」,蔡東豪哥哥作為財技高手的金身罕有閃現,領銜演出財經大戲,單嘢幾個月搞掂,2005初東豪BB收返埋個金身,閃咗去佢老闆的另一隻殼精電做行政總裁,犒賞人工暴跳到10球一年。呢場十年前蔡東豪哥哥一手策劃的文化大龍鳯,仲有董平同保利文化(3636)的瓜葛,早排「文化大拍賣(下)」已經寫過,唔重覆。

阿蔡生去咗精電搞工業革命,佢在「華億新媒體」董事會,一直保留非執行董事的職務,直至2008年初,「華億新媒體」隻殼搞完一輪後,再賣俾另一個文化界財資高手,前網通CEO兼中國寬帶產業基金創辦人田溯寜,「華億新媒體」再變身「華億傳媒」,蔡東豪哥哥同董平一齊撤出華億董事會

一個人有兩塊臉,唔出奇,蔡東豪哥哥做財經評論員,都警訓過小投資者,上市公司股價經常失驚無神大起大落,而董事會又次次同你講「不明股價升跌原因」,多數有古怪,唔知點解,蔡東豪及董平,在「華億新媒體」董事會,共渡近兩年零八個月歲月,期間在港交所發出的「不明股價及成交波動原因」通告,又足足發咗20次;同樣,眾所久知,阿蔡生好痛恨大陸大鱷混水漠魚,破壞香港「核心價值」,不過又可以同董平合作無間,教曉「文化商人」股市的藝術,社會主義中國的文化藝術界,從此染滿資本主義香港的銅臭,呢啲咪叫一國兩制囉。歷史上的財經「Hi」story會記住,當「文化商人」遇上「以為自己是文化人的企管人」時拼發的火花。

學滿師的董平,玩完「華億新媒體」後,好快揾到另一隻殼,叫做「上聯水泥」,亦即係今日的文化中國,幾年來股價彈吓插吓,同樣搞完一輪再揾科網猛人(今次係馬雲)落搭,金蟬脫殼,套路似足十年前華億場戲。文化中國在2013年7月,透過高盛射咗批貨出街,價值約2.7個億,每股成本唔使5毛,當高盛收半個佣,做呢單刁都係賺得百零萬,一球佣竟然請得郁高盛,當有仙人指路,大雞唔啄細米,原來大大大茶飯在後頭,不過高章到冇人識睇咁解。

如果在蔡東豪哥哥檔主場新聞,用「阿里巴巴」做關鍵字搜索,新聞加評論冇一千條都有幾百,今次阿里巴巴收購文化中國搞到全城炒仔坐艇,David Webb都叫證監去查,平時好配合股壇長毛發功的蔡東豪哥哥,竟然又一粒字都冇提過,咁大個位都唔入,留手咗啲囉,阿蔡生將佢十年前同董平合作的經驗,拎返出嚟同投資者分享吓就好喇。

好多人都問緊,文化中國大龍鳳,究竟係咪騰訊(0700)及阿里巴巴的孖孖「馬馬」呃你媽媽?呢個問題,全香港最有資格評論的,只有蔡東豪哥哥了,聽講阿蔡生及董平,兩位文化人的辦公室,都在香港金融中心的一座土豪色寫字樓,蔡生撞到故人的時候,唔知會唔會順便幫香港散戶八掛吓呢?又唔知蔡東豪哥哥會唔會繼續監察大陸大鱷的風格,出嚟主持正義,帶蟹民出苦海呢?

好緊張,好緊張,好緊張呀!

關連文章:
1. 財經林峯
2. 文化大拍賣(下)

伸延閱讀:
1. 信報:中國電影幕後推手
2. 財富人生:文化商人的資本遊戲
3. MediaInfo: Meet the boss!Johnson Ko

同場加映:
同一屋簷下

22 則留言:

  1. 蔡東豪條契弟大把人當佢神咁拜,攞命

    回覆刪除
  2. 甘係咪即係蔡生都係金融古惑仔呢?

    回覆刪除
    回覆
    1. 金融世界,人人想搵Bank Cheque,個個都係財經演員

      刪除
    2. 禾對金融惑仔冇任何意見,不過當古惑仔日久日同你講良心,順叔又忍唔能住吳倫順上身

      刪除
  3. 頂你駛唔駛寫得咁啜核呀?!
    仲有,你當然知道蔡生做過證監會「上市委員會」委員架可?

    回覆刪除
    回覆
    1. 頂,禾建議香港映畫倫理協會,仲有慧妍雅集,都應該揾阿TONY哥哥做主席啦

      刪除
  4. 順叔唔再係報紙寫野後,D 文比之前仲無保留,正呀喂!!

    馬雲食完呢次大茶飯後,就算「呃你媽媽」日後唔係香港上市,斷估都會有好多分身 / 影子係香港市場,小加哥唔駛愁。

    回覆刪除
    回覆
    1. 哈哈,多謝繼續捧場。阿里巴巴掟咗62個億落嚟文化中國,餐飯都仲未食

      刪除
  5. 回覆
    1. Long time no see 老孫,點解你瘦能咗咁多?溝死女啦!?

      刪除
    2. 飲酒飲到入晒廠,最後戒甩咗。咁啲磅數就開始跌lu。

      刪除
    3. congrad. btw, seems that your FB post has helped fan this old piece a lot

      刪除
  6. 順叔你篇文到今日條腸被煮左ge日子仍然非常合時,等緊你ge續篇呀。

    回覆刪除
  7. 之前幾個月聽講主場有人高價收購/入股,網絡消息
    有有辦法查到係唔係有人扮受害者做場大龍鳳呃哂全香港人

    回覆刪除
  8. 回覆
    1. 呢篇嘢的前傳,在文化大拍賣(下)裡面:

      ...叫得做中國影視文化第一紅人,等閒古惑仔又點會埋到身,有一間香港上市公司,當時叫做「友利」(0419),成功拍住保利華億,食咗餐大茶飯。

      呢個故仔要從十年前,香港商業電台一個風電飄搖的晚上開始講起,當時發生疑似香港名咀封咪慘劇,時任商台營運總裁的蔡東豪,黯然離開五台山,功力深厚的演員唔會冇人揾佢拍戲,2004年10月,友利宣佈委任蔡東豪做執行總裁兼董事總經理,但係,人工只有月薪1萬港元,重覆,冇寫錯,係1萬港元,應該創下咗香港上市公司執董級打工仔的最低工資記錄。當然啦,一雞嘢又點會引到守身如玉的蔡生搲爛塊臉拋個金身出嚟,友利好快有大龍鳳上演,2005年2月,宣布印公仔紙作價5億幾港銀入股保利華億旗下一抽垃雜資產5成股權,交易涉及的資產,包括海南電視台合營的旅遊衛星頻道,當時內地傳媒21世紀經濟報道,曾經質疑友利及保利華億的交易疑點甚多,不過單刁透過友利主席高振順向董平進行收購,即係唔需要友利小股東通過,賣方可以先套取現金,當時阿蔡生亦有同香港傳媒講,內地媒體發展機會好大,係理想時機進軍內地傳媒云云。

      都話天地有正氣,只要夠正義,曉,大賊可以叫做羅賓漢。阿蔡生當時已經係港交所上市委員會成員,多年嚟強調企業管治小股東權益形象深入民心,人綠好形象佳,單刁無驚無險衝過終點,友利股價仲一度爆升一倍,信者得救,益埋小股東。阿蔡生亦好快將個金身收返埋,2005年3月辭任友利董事總經理職務,同時加入佢老闆高生另一隻啱啱收返來隻殼,精電(0710),做吓行政總裁搞吓工業革命咁,後來金身再度閃現,精電失驚無神秘撈副業,炒燶唔知「I Kill You Later」定「乜Link衍生工具」,此乃後話,不表。

      有錢佬大孖沙,好多時會養埋一堆特異功能人士,平時可能飲茶食飯,有需要的時候幫老闆做一兩單大嘢,或者解決一兩個問題,已經值回票價。友利做咗保利華億單大茶飯,阿蔡生功成身退,人工從友利年代的1萬銀1個月,跳到精電的10球1年。十年人事,友利變身「華億新媒體」再變身「華億傳媒」再變身到而家的「中國9號」,股本一拆再拆,幾經溝淡的最新股價,唔值5毛,2005年初衝咗入去買保利華億文化概念的散戶,要等股價反彈百幾二百倍先可以返家鄉。另一邊廂的保利華億,亦唔好得去邊,保利後來拆咗隻保利博納去美國上市,藝術品拍賣越做越大,今日做埋上市集資主打資產,據保利文化中文招股書第203頁資料顯示,保利文化同華億系統,仲有官司未擺平。

      最近有謠言話,董平捲入大陸大老虎大案,相關上市公司已經發通告否認咗,真真假假,或多或少顯示,在大陸投資電影,搞文化,絕對唔係零風險生意。十年前,作為友利董事總經理的蔡東豪,都算係保利文化半個交易對手,可以話係香港最有資格抽秤保利文化的事事評論員,作為一個文化人,阿蔡生近年對中國模式亦好有意見,瓣瓣都開到正,如果唔寫吓保利文化盤文化大龍鳳,指點吓香港散戶就有少少可惜喇...

      刪除