2010年4月30日星期五

香港傳媒(下)

(刊於2010年4月30日am730)

上市傳媒股當中,09年業績顯著反彈者,只有星島集團(1105),虧轉盈賺1 億鬆啲,其一因為白報紙價格記錄高位回落,管理層亦解釋,溢利貢獻最大業務,來自免費報章,條數冇拆開,但大家可以想像,舊年免費報紙市場,應該幾好景,食咗唔少傳統報章廣告。(AM730同事,應該叫老闆加人工。)

靠互聯網廣告收入嘅業務模式,從來都唔穩陣,市場調查公司,對廣告開支統計同預測,亦冇乜邊個準確,所以乜乜物物調查,話香港網上廣告增長幾多幾多,聽過就算,不過,近年隨便打開一個傳媒網頁,好多廣告POP嚟POP去,斷估唔少廣告商,放多咗錢賣網上廣告。至於新媒體賣廣告會唔會成為主流,呢個問題,其實問緊未來大趨勢,睇報紙定睇電腦,
唔識答,不過順叔唔會挾住部iPAD入廁所。

舊年係經濟災後重建一年,絕大部分投資者摸住石頭過河,08年底09年初做BUDGET,廣告預算唔會做得太進取,媒體叫價亦唔會太辣,免費報章及互聯網廣告收入增加,TVB及壹仔等主流傳媒,廣告收入未見大反彈,未必係趨勢,而係週期。

所以如果壹傳媒安於現狀,冇新搞作,賺錢能力回復信貸危機前水平,問題唔大,不過肥佬黎永遠處於創業狀態,台灣印刷業務開始修成正果,又開始燒錢搞互聯網電視。

壹仔互聯網業務,至舊年3月年度,收入4千幾萬,蝕6千幾萬,計師奶數,一年燒一億。壹仔之前新報紙雜誌開檔,無論香港定台灣,搞唔少出位動作、擲唔少錢爭取市場注意力,今次搞互聯網電視,暫時非常低調,可以預期,投資高峰期可能仲未出現,大家想知道大約乜料,可以上壹仔網站瞄瞄,暫時睇,見唔到當年壹週刊同蘋果日報嘅WOW FACTOR。

壹仔搞印刷傳媒,成功之道,在於一個看似飽和市場,生劏一個市場空間出嚟。香港市場冇發展空間,衝去台灣;資料爆炸分薄傳統媒體廣告收入,殺入互聯網。但地域擴張同掌握互聯網技術,完全兩回事,所以壹仔股價,暫時反映出嚟者,係風險折讓。

講到尾,香港同台灣,都係圍城,媒體密度可以話冠絕全球,又有一班肯蝕錢買影響力嘅老闆,市場細多人爭飯食,除非大陸開放媒體市場,新聞傳媒股,好難發圍。

香港新聞從業、傳媒股股東,應該爭取中國加快民主化,第一步,有機會就大聲嗌:「霍震霆唔代表我!」

關連文章:
1. 香港傳媒(上)(下)

香港傳媒(上)

(刊於2010年4月29日am730

今個星期講傳媒。

先插一個人,霍震霆。

富豪第二代當中,最無能未必輪到佢,但在立法會,最無功能議員,肯定係霍震霆。

張廿蚊口臭,最少都叫做為自己選民問責,霍震霆代表「體育、演藝、文化及出版界」,十幾年嚟做過乜嘢,香港記者俾人打、被屈走粉,呢條友粒聲冇出,立法會考勤永遠排第尾,係咪國家領導人個仔大晒,可以霸住屎坑唔痾屎。

各位觀眾,呢啲叫做「功能組別」。如果普選立法會唔等如取消功能組別,唔該捧幾件有心議政人士上枱。
唔痾屎,最少放個響屁做吓戲,呢方面,唐唐識做好多。

唐唐出席新聞獎頒獎禮,公開關注香港記者待遇差,同最低工資有得比,新聞傳媒留唔住叻人,影響新聞質素云云,唔少無冕皇帝,可能會因為呢翻說話加唐唐印象分。

不過如果香港政府,真心關注新聞傳媒福址,應該向北京爭取更大新聞自由。

順叔唔係卿姐上身,只係望翻轉頭,主權回歸之後,幾乎各行各業,或多或少,都因為背靠祖國,市場大咗多咗發展空間,十幾年來,唯一未能受惠於中國經濟起飛行業,相信只有新聞界,CEPA等如屍爬。同樣係傳媒,同人唔同命,唔少演藝界人士,因為大陸市場發過豬頭;記者,得個睇字。

近年成功在大中華,開拓新市場空間上市新聞傳媒,只有壹傳媒(0282),九年前進軍台灣,台灣業務現佔公司收入約四成。如果香港傳媒老闆,可以排隊入大陸,肥佬黎肯定排龍尾,但一個唔該兩岸經貿甜蜜蜜,壹仔半隻台灣概念股,反而可以受惠於大陸銀彈政策,單秤呢樣,管理層眼光氣魄,相對同業,值得俾多幾個錢溢價。

壹仔今年以來,股價反彈逾四成,現市值約35億港元(下同),至08年3月年度,壹仔純利5.2億港元(下同),如果賺錢能力重返呢個信貸危機前水平,市盈率唔夠7倍,但暫時睇嚟冇咁好境。

理論上,經濟反彈,傳統傳媒廣告收入會跟住上,但係呢種情況,暫時未反映在上市傳媒公司身上。TVB(0511)舊年賺得9億,倒退近一成半,壹仔至舊年9月上半年,亦因為廣告收入大減,賺得2.2億,倒退超過四成,廣告去咗邊,自然係新興媒體,第一係免費報紙,第二係互聯網。

下回再續。

關連文章:
1. 香港傳媒(上)(下)